<中華料理> 西炒飯 (附食譜)

近排真係越黎越懶喎
之前咪成日都話唔想煮飯既
呢排係想煮架
但只想煮d快靚正既野囉~~
你地睇下黎緊我煮既野就會知架喇

想煮快靚正既野都要搵靈感既
其中一個來源係茶餐廳
係呀....整茶餐廳既炒粉麵飯都幾方便架
快快手就整起
同埋一定食得飽...
煮多幾款之後,就更加唔會再想去茶餐廳食野囉
因為原來好多野都好易整架咋
而且價錢平好多囉

早兩日又係炒咗個茶餐廳飯
不過唔係我諗出黎架
話說我之前整咗茄汁蝦
我家主人食食下蝦時突然間話
呢個汁可以用黎整西炒飯喎
哦...咁我咪搵日整俾主人食囉......

其實呢...由細到大我都無乜點食過西炒飯架
所以無idea到底要點整
唯有問下主人西炒飯裡面有d乜野啦
佢話主要係有腸仔同雜豆喎
唔...我唔係好食雜豆的
一於整個變奏版西炒飯啦
因為屋企仲有洋蔥同札肉嘛
一次過炒埋佢地啦~~

材料:
白飯  2碗
有機番茄仔  5-6個
腸仔  4條
札肉  3片
洋蔥  1/4個
甘荀  半個
蛋  1隻

醬汁:
茄汁  4湯匙
水  2湯匙
白醋  2茶匙
生抽  3/4茶匙
糖  1茶匙

廚具:
Le Creuset BBQ Pan

做法:

1.  腸仔切片,甘荀去皮切粒,洋蔥札肉切粒備用
2.  番茄洗淨一開六,蛋打散備用
3.  將醬汁材料拌勻
4.  2湯匙油中火起鑊,爆香洋蔥粒
5.  加入甘荀粒,腸仔及札肉炒香後,放入白飯炒至乾身
6.  分數次加入蛋漿繼續炒至乾身
7.  倒入番茄醬汁炒至乾身後,放入番茄炒兩炒即成

<東南亞料理> 白咖哩炸魚飯 (附食譜)

大家有無食過沙爹王既白咖哩嘛?
白咖哩豬扒飯呢....
我去親沙爹王都會點黎食架
不過...真係從來都無諗過自己整架喎
搞乜都最後會喺屋企整架先?!?

話說有日,我問咗我家主人一個問題
你想食焗魚柳定炸魚柳呀??
得到既答案竟然係白咖哩炸魚吖
當堂滴晒汗啦....搞咩呀?玩我咩....
唔...我係好老婆黎的
你想食,我就盡我能力啦

不過....整白咖哩要用白咖哩粉喎
上網search過明明話惠康有得買架
但我行咗好多間都搵唔到囉
supermarket無,咁諗住去下賣東南亞野既舖頭有無啦~
唉,行咗3個鐘....
泰國,印尼,連印度野都睇埋都買唔到
度度都無既....即係唔駛整啦~

本黎打晒輸數,以為無得整架喇
咁啱同朋友講起
佢問我馬拉會唔會有得買呀?
(原來佢會去馬拉)
嘿嘿....我話白咖哩粉係馬拉野黎架~~
就係咁,朋友幫我喺馬拉帶咗白咖哩粉返黎~~

除咗白咖哩粉之外
其他材料就好易買到啦
去supermarket買包整冬蔭公既材料包就得啦
不過整完出黎...都好食
但同沙爹王既硬係差少少囉
唔通因為我無落洋蔥?

材料:
白飯  2碗
魚柳  2條
雞蛋  1隻
粟粉  適量
乾蔥  2粒
白咖哩粉  2湯匙
椰漿  200ml

汁料:
雞湯  150ml
水  150ml
南薑  1舊
香茅  2小枝
檸檬葉  8片

調味料 (煮汁用):
鹽  1茶匙
糖  2茶匙
水  2湯匙
粟粉  2茶匙

調味料 (醃魚用):
鹽  1茶匙
胡椒粉  少許
蛋白  1隻

廚具:
公仔麵煲 (煮湯及煮汁用)
Le Creuset BIS 20cm Round French Oven (炸魚用)

做法:

1.    乾蔥去衣切細粒,南薑去皮切片,香茅切粗條備用
2.    魚柳解凍,用廚紙吸乾水份
3.    魚柳切件,加入調味料醃20分鐘
4.    中火加入水及雞湯,滾起後加入香茅,南薑及檸檬葉煮15分鐘
       (檸檬葉先用手搓一搓才落會更入味)
5.    湯煮好後隔渣備用, 水2湯匙及粟粉2茶匙拌勻備用
6.    雞蛋打散, 於魚柳上沾滿蛋汁,再拍上粟粉
7.    中火燒一煲油,油滾時放入魚柳,炸3-4分鐘至金黃色
8.    炸好之魚柳先放於廚紙上,吸一吸多餘油後放上碟
9.    中火1湯匙油起鑊,爆香乾蔥蓉,加入咖哩粉炒香
10.  注入已煮好之湯汁煮滾後,再加入椰漿煮滾
11.  加入料味料拌勻,再加入粟粉水將白咖哩汁煮至濃厚,熄火
12.  白飯放於炸魚旁邊,再於魚柳上淋上白咖哩汁即成

<中華料理> 茄汁蝦 (附食譜)

近排好似少咗整紅肉

係呀...我呢幾年肥咗好多嘛

我知要我減返到未結婚前咁瘦

應該係無可能既事架喇

一黎我真係好鍾意食野

見到好野食一定忍唔到口

二黎個人年紀大咗

新陳代謝慢咗好多啦嘛

咁點減肥吖,總之唔好再肥落去都偷笑啦~~

就係咁囉,唔想越食越肥

如果可以既就盡量食得健康d囉

紅肉呢d野少食少食啦~

當然唔係完全唔食

只係食少d紅肉食返多d白肉好似好d咁啫

本身唔係好食魚既我

唔食紅肉就唯有食雞同埋其他海鮮啦

除咗魚之外,大部份既海鮮我都鍾意食的

蝦都係其中一樣

白灼蝦,黃金蝦,奶油蝦,椒鹽蝦.....

好多做法都好好味吖

今次我整咗個茄汁蝦囉

唉...茄汁蝦從來都唔係我首選架

因為我唔多鍾意食茄汁既

但係呢...我家主人係茄汁怪

好鍾意食茄汁架

咁我今次就係想就下佢

整返個佢會鍾意食既餸俾佢歎下囉

我今次用咗急凍虎蝦

因為而家休魚期,要喺街市買大隻既蝦都好難架

反正茄汁蝦係好濃味

用急凍蝦都無乜影響啦

喺Taste買一盒$138有4大隻

兩個人食都夠啦

材料:

急凍虎蝦  4隻

薑  4片

乾蔥  2粒

醬汁:

茄汁  2湯匙

水  1湯匙

白醋  2茶匙

糖  1茶匙

生抽  半茶匙

廚具:

電炸鍋

Le Creuset BBQ Pan

做法:

1.  用剪刀將蝦鬚及蝦腳剪去,於蝦背切一刀,挑去蝦腸

2.  剪開蝦頭,將頭內既黑色身沖去

3.  用廚房紙將蝦上之水份吸乾

4.  薑切絲,乾蔥切片備用, 醬汁所有材料攪勻備用

5.  預熱電炸鍋160度,放入蝦走一走油 (約30秒)後,用廚紙吸去多餘油份

6.  中火1湯匙油起鑊,爆香薑絲及乾蔥

7.  加入蝦快手兜一兜

8.  倒入醬汁炒至收汁即成

<中華料理> 蒜蓉腐乳雞翼 (附食譜)

好似近排多數都係煮中式野添
係呀,無乜心機去研究d新野吖嘛
真係一天氣熱呢...就諸事不成喇
好多時我都會同自己講
下星期一定要煮多d新野
嘻...得個講字囉~~
真希望夏天可以快d過
等我可以煮返多d好野食~~

尋晚整咗雞翼呀
唔駛我多講大家都知雞翼可以有好多煮法架啦
蒸,炆,煎,炸樣樣都得
我呢今次黎個半炆半煎版啦
即係煎到咁上下再炆
咁個雞皮有少少金黃色咪好似靚仔d囉!

記得舊年喺面書既LC谷
曾經有個大熱菜式叫無水蒸腐乳雞翼
當時我都有試整埋一份啦
味道都可以的,因為腐乳本身好惹味嘛
不過我始終唔多喜歡蒸雞翼
可能係蒸出黎食落口既口感唔太好呱

所以呢,我今次唔蒸啦
煎到咁上下加入腐乳炒
之後再加少少水炆
出咗黎既效果比蒸更好
腐乳味更香濃喔~~

材料:
雞翼  10隻
薑  3-4片

調味料:
鹽  1/2茶匙
糖  1/2茶匙
紹酒  2茶匙
薑汁  1茶匙
麻油  少許
胡椒粉  少許

醬汁:
水  150ml
腐乳  4磚
蒜蓉  1茶匙

廚具:
Le Creuset BBQ Pan

做法:

1.  先準備薑汁,薑去皮磨成蓉再榨成薑汁備用
2.  雞翼洗淨,用廚紙吸去水份,加入調味料醃1小時
3.  腐乳及蒜蓉拌勻備用
4.  用2湯匙油中火起鑊,爆香薑片
5.  放入雞翼煎至7成熟
6.  加入蒜蓉腐乳與雞翼炒勻
7.  倒入清水,煮至汁底濃厚即成

<中華料理> 黑椒牛仔骨煲 (附食譜)

唔知大家有冇去惠康買過佢地d扒呢
我呢...從來都唔會買d百佳牌呀惠康牌既牛扒架
因為我硬係覺得會唔好食
心裡面又認定咗呢d牌子既野係低質素既
唔單只係食物啦
同牌子既日用品我都一定唔會買黎用的
真係信心既問題

但其實之前有朋友同我講過
惠康牌既牛扒係食得過的
當然我聽咗就算啦
叫我買黎食就唔好搞我啦
牛扒有好多其他既選擇啫

但前排我好煩惱唔知煮乜餸時
俾我喺惠康見到盒牛仔骨 (當然係惠康牌啦)
見到既時候我已經喺超市行咗一輪
行黎行去都唔知買咩好
於是把心一橫就買咗盒牛仔骨
決定返去整黑椒牛仔骨煲

熱鬼辣辣介整煲仔菜?
係呀,無所謂啦
反正食飯時都會開冷氣架啦
講返盒牛仔骨先
估唔到真係有驚喜喎
真係諗都冇諗過會咁"林"架喎
好食過平時喺凍肉舖買既多多聲呀

早知一早聽朋友話買惠康牌牛扒啦
可能真係會唔錯架
試過佢d牛仔骨,我諗我以後都唔會再去凍肉舖買啦
等我遲d試埋牛扒先
有興趣既朋友都買黎試下吖
(雖然可能係我咁啱買到盒好既)

材料:
牛仔骨  1磅
甘荀  1條
洋蔥  1個
蒜蓉  2茶匙
生粉水  適量

調味料:
生抽  1茶匙
老抽  1茶匙
黑椒碎  1茶匙
紹酒  1茶匙
糖  少許
鹽  少許
麻油  少許
生粉  2茶匙

汁料:
蠔油  2湯匙
黑椒碎  1茶匙
水  100ml
糖  少許
鹽  少許

廚具:
Le Creuset BBQ Pan (煎牛仔骨用)
Le Creuset BIS 20cm Round French Oven

做法:


1.    牛仔骨先於前一日從冰格放到雪櫃解凍
2.    甘荀去皮切厚片,洋蔥去衣切件備用
3.    牛仔骨切件,用廚房紙吸去血水
4.    牛仔骨加入所有調味料醃30分鐘
5.    中火2湯匙油起鑊,放入牛仔骨煎至7成熟後盛起
6.    所有汁料拌勻備用
7.    中火2湯匙油起鑊,爆香甘荀及洋蔥
8.    牛仔骨回鑊略炒,加入蒜蓉炒勻
9.    倒入汁料煮滾後,下生粉水煮至醬汁杰身即成

<中華料理> 黑松露牛肉炒飯 (附食譜)

前兩個星期去City Super買咗支松露醬
唉...提起呢支醬就唔開心喇
買既時候無諗過格價既問題
總之一見到時就買
買完之後朋友喺第度買咗支一模一樣既
我買時$155,朋友買只係$130
駛唔駛差成廿幾蚊先......激死我喇~~

咁....呢支松露好ok既
之前有喺樓上買過
一比較之下....唔駛講啦
貴呢支果然係香好多好味好多喎
真係一分錢一分貨
要食好少少靚少少都真係唔慳得的

支醬...本身係因為想焗松露三文魚而買既
焗咗一次之後覺得好正
之後嗰幾日......
我好似中咗松露毒咁
煮乜都想加d松露醬落去囉~~

其中一樣就係呢個松露牛肉炒飯喇
話說有日lunch我去咗食Tenpanyaki
成個餐除咗薄燒牛之外仲有燒魚燒蝦
一邊食個心一邊煩緊唔知夜晚煮乜野食好
食到尾段見到師傅炒飯
咦....ok喎...炒飯都好喎
如果到時我仲飽既話
可以炒一人份都得嘛~~

炒飯...d人成日都話隔夜飯好味d
我無架,通常我呢頭煮轉個頭就炒
最放都係放涼少少架咋
不過我煲飯時都專登落少d水
等d飯乾身d易炒d囉
至於牛肉...買普通牛肉攪碎就可以了
但我今次就用咗塊安格斯漢堡牛肉囉

材料:
白飯  2碗
漢堡牛肉  125g
甘荀  半條
雞蛋  1-2隻
蔥  4條
松露醬  1茶匙
油  2湯匙

調味料:
日式醬油  1湯匙
胡椒鹽  少許

廚具:
Le Creuset BBQ Pan 

做法:

1.    甘荀去皮切粒,蔥洗淨切粒備用
2.    雞蛋打散備用,牛肉灑上胡椒鹽備用
3.    2湯匙油起鑊,放入甘荀粒爆一爆
4.    加入白飯炒至乾身
5.    將飯鏟埋一邊,另一邊放入牛肉煎熟
6.    煎牛肉同時將蛋漿中炒至乾身
7.    將牛肉漢堡鏟碎並混入飯中炒勻
8.    加入醬油炒乾,試味並自行加醬油至合適鹹度
9.    加入蔥粒快手炒勻上碟
10.  於飯面放上黑松露醬即成

<日式料理> 日式冷烏冬 (附食譜)

就黎熱死人了
日日都三十幾度
一出街就係咁標汗
而家先至係7月,幾時先捱到個夏天完結呀......
冬天快d黎啦
我就熱到變成一灘水了

天氣咁熱,我家主人當然繼續無啖好食啦
我依然咋咋帝少少野就話出街食
買唔切餸呀,拎住好多野無手拎餸呀
未返到屋企呀,唔係好舒服呀
總之長期理直氣壯地搵籍口唔煮飯囉
再唔係煮都話:太熱喇,不如食簡單野吖?
哈,我都好識諗理由去縮短自己留喺廚房既時間

我唔係唔鍾意煮野食
不過天氣太熱焗住喺廚房真係好辛苦囉
煮完餐飯個人水啤啤咁出返廳
煮咗幾好味既野都無晒胃口食啦
睇怕黎緊呢幾個月都係煮快餐好了
我唔想喺廚房焗死囉

有見及此,尋晚煮咗唔駛點開火既野
嘻嘻,日式冷烏冬
淨係要開爐煎塊蛋餅同煮熟個烏冬
其他野現成可以即食的
雖然好似好方便,其實功夫都唔少架
樣樣野都要切絲喎
我唔係刀神,所以都花咗d時間去整架

話時話,凍烏冬我都係第一次整
亦都係第一次食
估唔到原來都幾好味架喎
明明話lunch食到好飽唔食晚餐既我
最後成碟烏冬俾我食晒囉....
唉....又話要減肥既?!?
睇黎都係失敗收場架喇
鍾意食野既人邊有可能會減到肥吖

材料:
青瓜  半條
甘荀  1個
蟹柳  2條 (我喺Sogo買特級蟹棒,1條都好大的,可即食)
雞蛋  1隻
三文治火腿  2片
稻庭烏冬  2個
冰水  1L
油  2茶匙

調味料:
日式醬油  2茶匙
日式麻醬  適量
鹽  少許

廚具:
Le Creuset 22cm Round French Oven (煮烏冬用)
玉子燒 Pan (煎蛋餅用)

做法:

1.  煲一煲水,放入烏冬煮熟,盛起
2.  將煮好之烏冬放入冰水中泡浸3分鐘
3.  倒去冰水,將烏冬放入雪櫃雪1小時
4.  甘荀青瓜去皮刨絲,火腿蟹柳切絲備用
5.  雞蛋加入鹽打散備用
6.  細火加入油起鑊,倒入蛋漿煎成蛋餅 (期間不用將蛋反轉煎)
7.  盛起蛋餅,放涼後切絲備用
8.  將日式醬油加入,烏冬中攪勻上碟,淋上適量日式麻醬
9.  最後將青瓜,甘荀,蟹柳,雞蛋及火腿絲鋪於烏冬上即成

<洋式料理> 芥末籽香草蜜糖雞鎚 (附食譜)

繼續延續我既冇心機煮飯時期
可能天氣真係太熱
我想煮野食既意欲簡直去到新低點
上星期......明明買定晒餸喺屋企
但都仲有幾晚想唔煮
仲要我真係開口同我家主人講
不如唔好煮出街食吖

平時喺買定晒餸既情況之下
我好少會咁樣諗的
但呢排我竟然重覆問咗呢個問題幾次囉
睇黎我真係好攰好熱好唔想煮飯喎
明明已經係煮d好簡單既野架啦

當然到最後我都有煮啦
唔係樣樣野都可以雪咁多日架嘛
唔煮再擺,擺擺下可能又係掉
咁又好浪費啫
都要俾錢買返黎架嘛
所以到最後又係煮,不過係求其煮
完全無難度嗰d呢

嗱,等我又介紹下大家整d快野啦
好啱要返工但又唔想日日放工都出街食既朋友
芥末籽香草蜜糖雞鎚
之前一晚醃定放入雪櫃
第日放工返屋企焗就得喇
都算係幾方便架
同樣既方法仲可以用黎焗雞翼雞脾金沙骨
當然焗既時間就要自己adjust一下啦

如果鍾意蜜糖既你就一定要試下啦
芥末籽醬同蜜糖呢個配搭正到暈
再加埋少少香草焗,正~
懶懶地用黎整碟頭飯都可以吖

材料:
雞鎚 4隻
蜜糖 3湯匙 (入爐前塗面用)
雜香草  少許

調味料:
芥末籽醬 3湯匙
蜜糖 3湯匙 (醃雞用)
老抽 1茶匙
生抽 1湯匙
白酒 2茶匙
麻油 少許
胡椒粉 少許

廚具:
焗爐

做法:

1. 雞鎚洗淨吸乾水份
2. 將所有調味料及雞鎚撈勻(除白酒外)
3. 於雞鎚上刺上多個小孔(此為令雞鎚更入味)後將雞鎚及醬汁倒入保鮮袋
4. 雞鎚放入放雪櫃醃過夜 (最少醃8小時)
5. 預熱焗爐200度,另將白酒加入已醃好之雞鎚中
6. 於焗盤上鋪上錫紙,放上雞鎚,再於雞鎚兩邊灑上雜香草
7. 入爐每邊焗18分鐘
8. 焗爐轉220度
9. 於雞鎚兩面塗上蜜糖,再底面各焗3分鐘即成 
(鍾意蜜糖既可於焗完一面後多塗一層蜜糖才焗另一面)

<踏足伊豆與東京> 非一般的遊歷之計劃篇

呢個伊豆加東京trip
其實我今年2月時已經去咗
本來打算唔出計劃篇
直接講每日既行程內容就算架喇
因為已經去完返黎好耐啦嘛

但後尾諗諗下
我呢個真係非一般之旅黎架喎
真係好想俾大家睇下原本既planning同最後實行時既分別呀
平時去旅行,大致都會同planned既行程差唔多的
但呢次真係.....
從未試過咁亂咁不知所措的

究竟期間發生咗d咩事
搞到要臨時改行程改酒店?
暫時喺度賣個關子先
之後詳細講每日行程時
大家再慢慢睇就會知架喇
而家俾大家睇住個原始版本先啦

2014年2月16日
凌晨抵達東京=>新宿早餐=>河口湖=>河口湖木ノ花美術館=>河口湖遊覧船=>冬季花火大會
住宿: 富士河口湖温泉　ホテルニューセンチュリー
(一泊兩食24,900円)
2014年2月17日
酒店早餐=>御殿場取車=>御殿場Premium Outlet=>修善寺梅林
住宿: 天城湯ヶ島温泉　白壁荘
(一泊兩食26,000円)
2014年2月18日
酒店早餐=>河津七滝=>河津町賞櫻=>収穫体験農園 ふたつぼり摘蜜柑
住宿: 隠れ湯の宿　月のあかり
(一泊兩食43,600円,露天風呂附客室)
2014年2月19日
酒店早餐=>大室山=>城ヶ崎海岸=>熱海還車=>東京Shopping
住宿: ホテルメトロポリタン東京
(素泊13,000円)
2014年2月20日
入間Mitsui Outlet => 池袋購物
住宿: ホテルメトロポリタン東京
(素泊13,000円)
2014年2月21日
全日東京市內購物

呢個行程....最後都改咗唔少
雖然未至於面目全非
但當中都需要好多精力去應付突變
今次真心覺得原來識少少日文真係唔錯
當你打去酒店問野時
當你打去租車改booking時
佢地真係會話你知佢係唔識英文的
喺呢個時候,我d小學雞日文就大派用場啦

到底呢個trip發生咗d咩事
究竟又有幾非一般
大家留意住我既遊記啦~

<日式料理> 豆乳豆腐粉絲鍋 (附食譜)

呢排又試瞓得唔好添
個人唔夠瞓呢,連煮野食都冇乜心機
講真架,我成日都想整多d唔同類型既野架
雖然我煮野唔係叻
我又冇特別再去上d cooking class
但我唔想我家主人成日食黎食去都係嗰幾樣餸嘛

大家話我小女人又好乜都好啦
好多時煮完餐飯出黎
我家主人食落口之後
拍一拍枱,再輕輕講一句好味
就已經令我覺得好開心啦
呢個亦都係我想煮多d唔同野食既原動力黎架
有咩開心得過有人欣賞自己煮既野食先~~

不過我既煮意真係好一時時
有心機煮既時候會好認真諗
但懶起上黎又真係可以好求其
蒸吓蛋烚下菜又一餐
呢...好似呢排咁冇心機
當然又係煮d唔駛用腦既野啦

不過我前兩個星期好似食咗好多蛋
加上我隻鑊又爛鬼埋
即係蒸唔到蛋啦......
唔蒸蛋就整豆腐囉
豆腐我都好鍾意食的
而且仲係我既慳家首選頭三位之一既餸黎架

開頭我打算整味噌豆腐鍋架咋
野都買晒架喇
但臨整之前...突然間....
覺得整個豆乳鍋底都好似唔錯喎
(又豆腐又豆漿,黃豆怪咁)
就係咁就變咗豆乳豆腐鍋囉

呢個餸冬天時先食會開心d架
因為冬天凍冰冰食個熱辣辣既豆腐鍋會好正嘛
但而家大熱天時仲成鍋野咁食就....
都唔係唔得既
反正都會開冷氣食飯架啦
都冇分冬天定夏天先食了

材料:
蒸煮豆腐   1盒
韓式粉絲  80g
蘿蔔  1/3個
日本大蔥  1條
本菇  50g
椰菜  半個

湯底:
無糖豆漿  400ml
雞湯  200ml
白味噌  4湯匙
料理油  1湯匙
糖  1茶匙

廚具:
砂鍋
Le Creuset BBQ Pan (煮粉絲及蘿蔔用)

做法:


1.  椰菜切片,蘿蔔去皮切件,蔥切大粒備用
2.  煲一煲水加入粉絲煮2分鐘,盛起
3.  再煲一煲水,放入蘿蔔煮10分鐘,盛起
4.  於砂鍋上塗上白味噌,再將所有材料放入砂鍋中
5.  注入豆乳及雞湯,開細火將材料煮滾
6.  滾起後加入糖及料理酒,再多煮2分鐘即成

私房雪菜的粉絲專頁: 
https://www.facebook.com/yummyfoodsnowkitchen

<洋式料理> 慢煮三文魚併魚子醬 (附食譜)

睇黎我會擺入口食既魚
都離不開係嗰三兩樣架咋喎
(魚生例外啦)
三文魚,銀鱈魚,鯖魚.....
仲有冇呢?!?有都最多仲有一樣半樣啦
新鮮游水魚就真係唔好預我喇
當係我蠢唔識食d好野啦,哈哈

之前唔知邊個星期喇
總之有晚睇吾淑吾食
見到Jacky Yu教整黑松露慢煮三文魚
我本來好想試下整架 (因為係我會食既魚嘛)
個樣真係好似好好味咁呀

我有好認真睇過做法架
不過呢...Jacky教嗰個魚要用冰鮮黑松露喎
冰鮮黑松露...真係唔知邊度有得買
我淨係知道去邊可以買到松露醬咋
上網都有google過架
但完全搵唔到冰鮮黑松露呢樣野囉
咁即係冇得整啦~~

雖然搵唔到材料整
但我仲好掛住呢個餸架
咁啱有日我仲見到759有三文魚柳特價添
唔理咁多,係咪都買返幾件返屋企先
最多之後先諗點整啦

最後.....冇乜idea既我
好求其咁整個慢煮三文魚
然後再喺魚面鋪少少魚子醬就算了
講返慢煮吖,我冇蒸爐又冇慢煮機
所以只好用熱水啦
我見好多人都教用40-45度水去煮
但係呢...煮野最少要65度先真係殺到菌吧
唔想食完會肚痛,我煮時係用咗較熱既水架

材料:
三文魚柳  2件
魚子醬  3-4茶匙
熱水 (65度)  1.5L

調味料:
橄欖油  1湯匙
鹽  1茶匙
胡椒粉  適量

廚具:
Le Creuset 22cm Round French Oven
20cm碟一隻

做法:

1.  三文魚柳洗淨吸乾水份,每件切成兩份
2.  將所有調味料抹於三文魚上,醃15-20分鐘
3.  三文魚放於保鮮紙上包好
4.  已包好之三文魚放入保鮮袋中,迫出所有空氣後鎖上拉鏈
(如有抽真空機可直接將魚放入真空袋,再抽真空即成)
5.  預熱焗爐200度,開2分鐘後熄爐
6.  魚放入煲中並注入65度熱水,於魚上蓋上20cm碟
7.  整個煲放入焗爐,等10-12分鐘
8.  將魚取出放於碟上,並鋪上魚子醬即成

私房雪菜的粉絲專頁:
https://www.facebook.com/yummyfoodsnowkitchen

<日式料理> 清酒煮蜆 (附食譜)

我....我....我之前諗咗好耐
好唔好喺面書開個粉絲專頁
心大心細咗好耐架
開...係因為想同多d人分享煮食心得
又或者出去食到好野又可以開心share
唔開...我唔係d咩名blogger
可能開咗都冇人入去睇
冇人睇...開黎做乜？

尋日唔知發咩神經
竟然又去面書開咗個粉絲專頁
哈哈....咁我都順便喺度賣下廣告啦
希望大家支持下
去一去我個粉絲專頁送我一個like吧!!
https://www.facebook.com/yummyfoodsnowkitchen
希望大家多多支持喔~~

呢排好似少咗煮飯
黎緊會煮飯既次數都少的
係呀,呢排好鬼多節目
好多飯局呀
搞到冇得煮飯添
但唔想又試停低咁多日乜都唔寫喎
咁又係時候出返d倉底貨啦

蜆....我唔係成日整黎食
我好怕吐沙吐得唔乾淨嘛
就算整...我都係獨沽一味
整豉椒炒蜆架咋
不過近排都見有朋友仔整下清酒煮蜆喎
咁啱我二月去伊豆又拎咗支清酒返黎
清酒...我唔多飲既
用黎煮飯煮咗佢啱晒啦~~

唔煮真係唔知
原來清酒煮蜆易整過豉椒炒蜆好多
冇step咁滯
倒晒落煲...給蓋...煮...食得
快靚正喔

材料:
白蜆  1斤
蒜蓉  2茶匙
蔥  2條
鹽  2茶匙
油  1湯匙

調味料:
清酒  3湯匙
日式醬油  1茶匙
牛油  10g

廚具:
Le Creuset BIS 20cm Round French Oven

做法:

1.  開一大盤水,加入鹽,倒入蜆數小時,讓蜆有足夠時間吐沙
2.  用1湯匙油起鑊,爆香蒜蓉
3.  加入蜆及清酒,蓋上煲蓋煮至白蜆開口 (只數幾分鐘)
4.  開蓋倒入醬油及牛油,兜一兜熄火
5.  最後灑上蔥花即成

<踏足北海道> 8日悠遊走之Day 8 (完)

2013年10月13日

終於到咗最後一日喇
由於我地搭下午16:40班機返香港
加上又要早兩個鐘到機場
又要預時間搭車過去
所以實際去行既時間一d都唔多架



朝早起身食個早餐先
冇好野食架,係食之前買落既杯麵咋
不過話時話吖,日本d杯麵真係冇得頂
平時喺香港我好少會食
因為食得多會反胃
但係日本杯麵就食多多都唔怕
所以去日本我絕對唔介意食杯麵的


食飽早餐即刻拎行李check out先
行李就梗係先放低喺酒店先啦
之後我地就行去搭地鐵
去邊度？去二条市場再搵食
(札幌市中央區南三条東1-2丁目)
喺地鐵大通站落車,行5分鐘左右就到架喇~


呢度我地之前都黎過架喇
上次黎係食魚生飯
但我地啱啱先食咗個麵,飯我真係食唔落喎
咁唯有圍住市場行下
睇下有咩冇咁飽既野食啦~


行行下我地又見到.....蟹呀
仲有好多香港人喺唔同shop問緊價
似係想帶返香港喎
唔....我地唔會拎返香港啦
最多即時買隻黎食架啫......



望住d蟹好想食呀
最終都忍唔住買咗1隻
價錢方面當然冇喺和商市場咁平啦
但3,300円1隻都已經比香港平得多了
老闆娘又幫我地剪好晒先上碟
仲排返靚靚的
食都食得開心d呀.....


食咗蟹我地都離開二条市場了
因為大部份既乾貨我都冇興趣買的
加上我地冇乜時間喇
我仲要趕住去買bao bao同去tokyo hands架~
買Bao Bao要去Parco (札幌市中央區南一条西3丁目3番地)
去到時想要既都冇了
我本黎係想買個紫色既6x6的
但店員話sold out囉
所以呢....我真係好憎代購
係佢地搶晒d袋，搞到我地想買都買唔到囉
當然最後我點都求其買個袋走~

之後仲想去Tokyo Hands (札幌市中央區南一条西6-4-1)
呀,個天已經落雨架啦
我地仲要行黎行去都搵唔到間野
長空本旅遊書想點?
個地圖錯架囉....跟地圖搵唔到架....
最後要問人加用另一個喺酒店拎既地圖
行餐死先搵到......去到仲要買唔到想買既野






跟住冇時間再行啦
要返酒店拎行李了
拎完行李搭13:55分班JR去機場 (1,340円per head)
去到機場即check in
見有時間剩就喺機場食埋lunch
我要咗個炸豬柳飯
老公要個拉麵 (2人合共2,100円)
唔好食的,叫做有少少野落肚咁啦
食飽就等上機返香港了

8日旅程好快就過咗
一切尚算順利
雖然去日本好似冇乜特別
好多人都會去
但我依然愛日本呢個地方
我愛日本文化、食物、景色.....
期待下一次既日本之旅喔~

<中華料理> 口水雞翼 (附食譜)

唔知有冇同大家講過
我個人本身好鍾意食辣野的
但我家主人呢...麻麻啦
不過而家已經比以前好好多了
以前佢係零辣架
家陣都叫做可以食到少少咁啦~~

當然啦~有人唔食得咁辣
我想煮辣野既時候會輕手d的
哈哈,唔得咁自私整完出黎得自己食到架嘛~
所以我會盡量唔整咁辣啦
(雖然大部份時間我覺得係零辣時依然有人話好辣...)

前陣子呢,我突然愛上咗口水雞喎
我好想自己試下挑戰架
但係呢...我唔識斬雞架嘛
所以拖咗好耐都冇整黎想
出街食又唔係好多地方有得食~
有得食呢...又唔一定整得好食先衰喎

so far食過最好味既口水雞
應該都係Yellow Door既最正
但可惜lunch time冇呢個餸
夜晚食又一定要食set
價錢一d都唔平
我又唔想成日食咁貴
咁點計都係自己整最化算啦~

唔想斬雞又好想食口水雞
咁...我只好改整口水雞翼啦~
嘻,當氹下自己,雞翼都好多冇啦
而且整雞翼應該快過成隻雞咁整
製成品味道都唔錯架,好惹味的
我覺得好味過譚仔既口水雞翼架~~

材料:
雞翼  12-16隻
鹽  2茶匙
蔥  3條 (煮雞翼用)
蔥  2條 (裝飾用)
薑  3-4片
白芝麻  1湯匙
花椒粒  1茶匙
八角  2-3粒
紹酒  1湯匙
冰水  適量

醬汁:
油  2湯匙
麻油  3湯匙
辣椒油  1湯匙
紹酒  2湯匙
生抽  3湯匙
花椒粉  半茶匙
花椒粒  2湯匙
鹽  少許
糖  2茶匙
蒜蓉  2茶匙
乾蔥蓉  2茶匙
指天椒  2-3隻

廚具:
公仔麵煲 (炒芝麻用)
Le Creuset BIS 20cm Round French Oven (煮醬汁用)
Le Creuset 22cm Round French Oven (煮雞翼用)

做法:


1.    雞翼解凍,洗乾淨後用鹽醃15分鐘,蔥3條切段,2條切粒,指天椒切粒備用
2.    白鑊開中火,加入白芝麻,炒至聞到香味熄火盛起
3.    中火煲一煲水,水滾後放入花椒粒,八角,薑,蔥段及酒煲8-10分鐘
4.    放入雞翼,水滾起後轉細火加蓋煮7分鐘,熄火焗10分鐘
5.    將煮好之雞翼放入冰水中浸10分鐘後盛起 (加入冰粒效果更佳),吸乾水份再放於碟上
6.    將所有醬汁材料攪勻備用 (除油,花椒粒, 蒜蓉, 乾蔥蓉及指天椒)
7.    中火用油起鑊,轉細火爆香花椒粒
8.    聞到花椒味時,先盛起花椒粒,加入蒜蓉及乾蔥蓉爆香
9.    放入指天椒炒一炒,轉中火再加入醬汁煮滾
10.  滾起後倒入芝麻熄火
11.  將醬汁淋於雞翼上,再灑上蔥花即成

<踏足北海道> 8日悠遊走之Day 7 - Part II

2013年10月12日
食飽飯時間都仲好早呀
所以我地繼續留喺豐平峽度hea
食飯前行上展望台冇乜野睇
咁食飽就行落下邊睇下會唔會好d啦
嗱,千期唔好叫我行山
雖然我都見到有條路可以繼續向上行
但天雨路滑,我唔想行行下碌返落黎囉~





唔......其實都係咁上下啦
一黎到時都有望到呢個view架
係遠睇同近睇既分別啫
好彩既係...喺呢個時候開始有返少少陽光
咁望落去d顏色係分明咗
所以會覺得靚咗囉~
沿住水霸條路一直行
其實有個展館既,入面都有少少豐平峽既歷史野講
不過我冇乜心機睇
都係快d走好了~

喺等電動巴士期間,又開始落雨了
而且雨仲越落越大
慘啦,我地之後仲要再轉車先返到定山溪
雖然有遮,但又大風又落雨
最後仲等咗半個鐘有多先有巴士返定山溪
真係慘慘慘呀~




到返定山溪我地都未返札幌住呀
雖然仲落住雨
但我地想去埋二見吊橋先
我地只係手拎住地圖
用自己對腳行去咋~
原來定山溪有好多酒店
而且酒店外既景色仲唔錯添
一路行一路見到好多貓咪
好慘呀,落雨佢地要縮埋一邊
仲要俾d小朋友追~~想嚇屎貓咩?!?






行咗幾耐呢?唔記得啦~
可能係20分鐘左右呱,咁就去到二見公園
再跟住條小路一直行
就會去到二見吊橋架喇
係咪好靚?我又唔覺喎
可能天雨影響心情啦
又可能以為會見到好多紅葉啦
不過如果大家有興趣去既就要留意開放時間喇
冬天應該唔會開放 (應該開5至10月啦)
詳情可以去以下網址check check
http://jozankei.jp/archives/208




我地只係喺二見吊橋逗留咗一陣就走喇
因為返札幌之後我仲要繼續shopping嘛
有咩好shop?唔駛講梗係行藥房啦
女士們去日本點會唔去行藥房先
一於去狸小路打個轉
行藥房買skin care呀,藥呀,風濕貼呀.....
我仲去埋買agnes b袋囉
收穫還可以吧!!


行到攰當然要食dinner啦
本黎諗住去狸小路食拉麵架
但下午喺豐平峽見到人地食燒肉又好似好正喎
嘻...我地最後去咗牛角食燒肉放題囉
(地址: 札幌市中央區南四条西2-11)
係呀,食放題....
佢地係會包一set基本野(沙律,蝦,帶子,牛舌...)
再自己另外任點menu上既野囉
好似係限時120分鐘的
野食質素都唔錯啦~~
兩個人任食放題加飲品放題8,106円


食飽飽又唔想郁
之前諗咩去坐摩天輪呀
唔去啦,聽日都要走咯
早d返酒店pack行李好過啦~
順帶一提,我飛之前喺日本樂天訂咗呢堆野
係咩黎?係香薰!
呢支野我喺香港某專賣日本野既shop買要HK$128一支
(唔開名啦,廢事倒人米)
我呢...喺樂天買只係HK$2x咋
仲要個個朋友試用完都話好正架~
所以呢...識既就自己去樂天買啦~