<洋式料理> 碎蛋吞拿魚三文治 (附食譜)

望到張相心裡面係咪諗緊......
唔係嘛?天寒地凍仲食凍冰冰既三文治?
當然唔係啦.....呢d係我之前整落既
不過又冇喺度講過之嘛
見之前整既時候好鬼認真咁影晒相
所以都post出黎啦

我知喎,碎蛋吞拿魚三文治
係太簡單既野黎喇
應該唔需要睇食譜既......
但我見當日自己整到懶靚咁
post出黎冇人睇既
自己得閒開返黎睇都一樣開心吖~~

我本身唔太好三文治既
不過有時一個人食飯
唔想出街食,又唔想嗌外賣
煮粉麵又覺得麻煩既時候
簡簡單單整份三文治都係一個唔錯既選擇咁囉

以前細個喺屋企食既自家佞製三文治
邊有吞拿魚做餡咁西化吖
通常都係茶餐廳版既蛋治
最多有時咁啱雪櫃有貨
就可以煎多塊火腿落去咁囉

到而家自己識整野食
就梗係唔整呢d啦
我唔係話細個食既三文治唔好味
只不過....太多油囉
講真...要煎到隻蛋唔黐底
其實要落好多好多油架.....
所以我都係唔整呢d茶餐廳三文治啦~

不過咁,我自己整既都唔健康得去邊啦
好味既野通常都唔健康架嘛
所以就算我冇用好多油煎
但落咗大量蛋黃醬都一樣係肥死架喇
冇計啦....我真係好鍾意食蛋黃醬喔!!

材料:
雞蛋  2隻
水浸吞拿魚  1罐
方包  2片
鹽  少許
胡椒粉  少許
蛋黃醬/沙律醬  適量
沙律菜  少許
車厘茄  數粒

廚具:
公仔麵煲

做法:

1.  於煲中放入適量水份,凍水放入雞蛋大火煮10分鐘
2.  吞拿魚擠去水份,放入大碗中
3.  煮熟之雞蛋去殼放入碗中,襯蛋還暖時加入鹽及胡椒粉
4.  將雞蛋壓碎並與吞拿魚拌勻
5.  加入蛋黃醬再拌勻
6.  於吞拿魚餡放於方包上,再切成4小份
7.  於碟上放上三文治,再以沙律菜及車厘茄拌碟即成