又靜咗好多日添
我唔係想偷懶架
不過早陣子太后入咗醫院
仲要一住就住咗幾個星期
我呢...盡量都每晚去探一探佢啦
佢一個人喺醫院又唔落得床
日瞓夜又瞓好鬼悶架嘛
我去陪吓佢傾一陣計都好吖
咁太后喺沙田,我又住元朗 夜間探病時間完既時候係19:30
我又冇一程車直接返到元朗
左轉右轉搞一大輪
最快返到屋企都9點
咁夜仲點煮吖
唯有出去食垃圾啦......
咁我又唔至於日日都唔煮 但煮都係煮簡單野 炒吓蛋呀,烚條菜呀咁囉 煮呢d野都冇乜好post出黎啦 就係咁我咪消失咗幾個星期囉~~ 喺呢段期間叫做見得吓人既就係呢煲粥 蟹粉瑤柱肉碎粥 我叫佢做富貴粥架 係我朋友整過好味話我知 咁我又仲有蟹粉喺屋企 所以咪試吓整囉 又真係好好味既,蟹粉用黎煲粥好香吖嘛~ 又話冇時間又煲粥 用開LC既朋友都應該知道一件事 就係用LC煲粥好快就有得食架 分分鐘快過你煮餐飯架 以前用不銹鋼煲黎煲粥搞好耐 但用LC就唔同,好快食得 自從用咗LC之後我真係煲多咗粥架~ 材料: 米 1杯(我用飯煲果隻杯仔) 水 1.8L 肉碎 120g 瑤柱 6粒
鹽 半茶匙
糖 少許
胡椒粉 少許
麻油 少許
Le Creuset 22cm Round French Oven做法:
1. 米洗淨,放入雪櫃用水浸過夜 2. 瑤柱洗淨用水浸淋搣成絲備用 (浸瑤柱水留起) 3. 倒去浸米水, 加入兩滴油將米撈勻 (嫲嫲話加油d米會易開花d喎) 4. 水(連瑤柱水一起加入)先煲滾,加入米煲至開花 5. 加蓋轉蚊滋火煲25分鐘 6. 將所有調味料加入肉碎中醃20分鐘 7. 轉中火,加入瑤柱及蟹粉煮10分鐘(期間不時攪拌) 8. 加入肉碎,攪拌5分鐘 9. 加蓋轉蚊滋火煲5分鐘 10. 加入鹽撈勻即成
半年一度既Le Creuset Private Sales終於開始喇
根據以往既經驗
LC一年會有兩次開倉
分別係每年既3月同9月
3月會喺九龍區,而9月就會喺港島區
之前一直等一直都冇消息
加上面書有人話問過LC既promotor
話今年3月唔會開倉
我都打定輸數,仲諗住可以慳返一筆添~
點知突然見d朋友話有喎
原來改咗喺4月囉....
要洗既錢始終都係要洗既~
不過呢,唔知點解我今次收唔到invitation card呀
之前嗰幾次都收到架喎
等咗好多日都等唔到呀
勁唔開心囉~雖然身邊都一定有朋友帶到我去....
今次開倉由4月4日至4月8日
當然如果你係VVIP既就早一日可以去掃貨啦
(可惜我唔係喎)
地點....改咗....
之前係喺尖沙咀的...
今年去咗佐敦既逸東酒店
開放時間上午10點至晚上7點
本身諗住唔去既我...
最後當然敵唔住去買平野既誘惑啦~
仲史無前例地勁早起身出去排隊囉
真係好早架,天未光搭第一班巴士出去喎
你地睇,未天光加條街冇人架~~
今之LC既安排算唔錯啦
因為派籌,一人一籌
期間仲有食蕉check number次序
咁好...起碼唔會俾人打尖吖
企街時間亦縮短,7點左右已經可以入酒店坐住地下等
(唔駛日曬雨淋,good!!)
先到先入好公平,唔會出現上次俾人打尖打到要報警既事嘛
仲會分批放人入,每個section 1小時15分鐘
夠鐘就要走,唔會好似以往咁有人坐成日
清晒一批人先放第批人入去
感覺安排得好好啦
唯一唔好既係一次放太多人入去(200人?)
但個場又細,真係寸步難行囉
今次有d咩好野呢?
對我黎講冇乜啦~
好多野我本身都有了
最開心係買咗個白色20cm Round煲 (HK$1,330)
多得好朋友眼利幫我搵到
如果唔係我都唔可以擁有佢~
仲有買個1 set 2隻既multi bowl (HK$240)
powder pink好鬼靚
其實我真係唔需要的
碗我已經有好多好多隻
屋企得兩丁友,買咁多碗做乜?
但呢隻色真係好靚喎
同埋朋友話之前喺韓國買1隻都要HK$200呀~
嘻,另外又買咗隻20cm multi bowl (HK$200)
又係powder pink
最重要既係佢好大隻
可以當公仔麵碗
又或者用佢黎醃肉都好呀
今次仲見到Espresso Cup & Saucer (HK$290)
我知道套野真係冇用
但佢細細隻太cutie喇
顏色就更加唔駛講啦
所以冇用我都買咗~
未完架...之前開倉我總係搶唔到花花盅 (HK$150)
雖然最後我都去日本outlet買到
但今日我見到既花花盅係powder blue
我未有吖~~同埋今日有好多貨喎~
唔理咁多喇,帶埋返屋企至算
仲有仲有....仲買咗2隻pie dish (@HK$90)
人就真係衰既
隻pie dish之前去日本outlet見過N次啦
當時又唔買喎....今日見到又再心思思
諗住用黎焗吓檸檬撻都好嘛
好啦,夠喇夠喇....
俾錢係要去第二間房既
尋日見d VVIP可以用HK$20就喺cashier買到圍裙/隔熱手套/place mat
咁抵...當然我都好想擁有啦
我見尋日圍裙已sold out
以為今日會有補貨
但原來冇架囉,我地等俾錢時已經冇手套了
連最後2 set place mat都俾我同朋友買埋了
好彩都仲買到一set~~
今次收穫唔算太豐富
但都ok啦...
而且對大會既安排都算滿意
唔會好似之前咁亂
俾$20按金又可以借用特大環保袋
都算係好好了~~
2013年10月12日
一早起身,食埋尋晚食剩既芝士撻
就出去搭巴士去定山溪啦
一出酒店門口,個人即刻開心晒
天氣好似好好咁囉
有藍天呀~~
不過應該之前有落過下雨的
因為我地見到彩虹小姐呀....
(你地見唔見到呀,雖然唔太清楚......)
喺札幌JR站隔離有個巴士站的
我地要搭7號巴士
上車前先到站旁邊既售票處買飛先
成人每位750円,車程約1小時
上咗巴士冇幾耐...又開始落大雨喇
唉.....d雨做乜要跟住我先?!?
由於我地冇諗過要搭巴士去
(之前嗰日去係可以揸車架嘛)
最後我地落錯車
之前有個站見到好多人落車
當時已經覺得奇怪架喇
因為應該有好多人都同我地一樣去豐平峽架
老公之前上網睇過
我地要去定山溪觀光協會轉車嘛
咁好正常梗喺觀光協會個站落車啦~
點知一落車....大鑊,觀光協會喺邊先?
原來...搬咗囉....要行返轉頭...
算,我當喺定山溪行吓,哼!!!
行返轉頭....1x分鐘左右呱....
終於見到個搬走咗既觀光協會
入到去有晒時刻表架喇
再行入少少有張枱仔
咁有個姐姐會賣飛俾你架喇
如果我冇記錯既話,好似來回一人300円
轉車都未去到豊平峽架
因為仲要喺豊平峽公眾停車場再轉電動巴士
就算你係自己揸車去都一樣
最多只係去到公眾停車場架咋
又係d環保問題啦,你淨係可以轉電動巴士上去囉
不過車程好快,10分鐘左右就到了
車費每人200円(來回)
一上到去乜都唔理即刻影相啦
靚又唔係唔靚既
但都有少少失蹤
紅葉比我想像中既少呀
係我地太遲去呱....
全場最紅都睇怕係呢一棵了......
之後我地又見到有車搭上去展望台
懶醒咁去排隊啦~
唔駛錢又唔駛行,慳返d腳骨力嘛
嘻嘻,點知原來好近架咋
早知唔等啦,等車時間分分鐘耐過自己行
抵達展望台....
好似同喺下面睇差唔多之嘛
冇乜驚喜囉~~
可能真係希望越大失望越大啦~
我覺得冇太陽影相出黎唔夠靚囉
但其實停咗雨都應該好感恩了
見到冇乜特別
心思思又想食野
其實一上到展望台隔離有間餐廳
仲擺晒d枱喺露天位置俾遊客食燒肉
見到人地食到津津有味
即刻走入餐廳想食埋一份
唉...燒肉得羊肉咋....我唔羊的
最後只好食咖哩飯啦~
呢d咁既地區,一碟飯要850円
但真係得咖哩咋...搵多粒肉都冇囉....
叫塞飽個肚就算了.... (續)
嘩...呢幾日d天氣真係....
淨係星期日落雹已經夠晒恐怖啦~
(又一城堅恐怖)
以為星期日過後會好d啦
都唔係既...日日都落9c喎
個天呢...一黑起上黎既時候勁恐怖
好似就黎跌落黎咁囉~~
都唔知搞乜呢幾日既天氣會咁既?
一陣落大雨,落完之後出一陣太陽
轉過頭又落大雨
天氣反常到咁
我呢個災難小姐會亂諗野
會以後天將降大禍於香港也架.....
唔好亂諗唔好亂講
都係正正經經講返煮飯好了
呢排牛魔王又再出沒
上星期連續整咗好多日牛牛呀
食到我都覺得燥燥地
睇黎要出去飲返d涼茶先得喇~~~
整咗咁多牛牛
都唔知講邊樣先好?!?
就講牛腩先啦~
柱侯牛腩我之前整過好多次
今次算係整得最好味既一次啦~
我用開李x記既柱侯醬架嘛
以前試過跟樽面既instruction去整
炆完出黎....冇味囉
一d味都冇喎....
之後都試過自己改分量既
不過一直都覺得味道麻麻地
估唔到今次亂咁黎整又ok喎~~
材料:
牛坑腩 500g
蘿蔔 1個
薑 6片
花椒 少許
八角 2粒
調味料:
水 600ml (如非LC煮食,水份量要加多一點)
柱侯醬 3 1/2湯匙
廚具:
Le Creuset 22cm Round French Oven BIS 20cm Round French Oven (汆水用) 做法: 1. 牛腩切件,煲一煲水,放入薑3片及牛腩飛一飛水 2. 蘿蔔去皮切大件,花椒八角放入茶袋備用 3. 中火用1-2湯匙油起鑊,先放入餘下之薑片爆一爆 4. 加入柱侯醬炒一炒,再放入牛腩炒勻 5. 注入清水,水滾後放入花椒八角 6. 轉細火,加蓋煮45分鐘,熄火焗個半鐘 7. 開中火,滾起後轉細火煮45分鐘,熄火焗1小時 8. 開中火,滾起後加入蘿蔔 9. 再滾起後轉細火煮15分鐘,熄火焗15分鐘即成
