＜走遍香港＞ 漫步大尾督

唔得喇唔得喇

我發現我有好多野想喺呢度講
但我出post既速度一路都趕唔上囉
北海道之旅有排都未寫晒
煮埋煮埋好多餸未寫recipe
去咗好多地方想同大家分享......
睇黎要再加快速度努力寫blog至得喇


呢.....今次講既大尾督......
又已經係幾個星期前既事啦
其實唔一定要吓吓去旅行先開心既
香港....都一樣有好多好地方架
大家放心，我唔係運動人
所以唔會同大家去行山
我去得既地方都一定唔會辛苦既

話說之前約咗朋友去大尾督既巴希雅BBQ
因為驚冇位泊車
所以我同老公早咗好多入大尾督
到等到位泊好車之後都仲有時間剩
所以我地都喺附近行吓啦

一講大尾督，大家可能只會諗到燒野食
但大家有冇留意個燒烤場係向海架呢？
只要唔好掛住搵吉爐或霸爐
對腳向前行多幾步
眼前就會出現好靚既景色喇



我去當日唔算好好天
其實黃昏時段係大霧既
睇唔到期望既鹹蛋黃日落
雖然有少少失望
但矇查查地睇日落都另有一番風味架

望完海一邊行一邊留意附近指示
原來仲有條路可以行去船灣淡水湖
開頭我以為要行好遠
因為冇乜人好似我地咁用腳行
大部份人都係踩單車上去的
點知原來好近架咋
唔駛10分鐘就行到上去

 一上到去又嘩嘩聲啦
長長既堤霸加上藍藍的天
好靚好得喎
唔怪之得咁多人上黎啦
加上有一大片空地
可以喺呢度放箏都得喎

所以話呢，邊個話香港冇靚景
問題係你有冇心去呢d地方啫
有時間去親親大自然
總好過出旺角尖沙咀同人迫啦