<洋式料理> 雜菜餐肉扭扭粉 (附食譜)

人煮飯我煮飯
喺屋企煮飯既原因
除咗覺得屋企附近d餐廳已經食到厭之外
仲諗住自己煮冇咁油膩
好似會健康d吖嘛

但係.....我煮咗飯之後.....
我同老公都越黎越肥囉
點搞呀?我已經唔係大魚大肉架啦
點解體重會直線上升先?!?
點解點解點解呀??????
唔通我煮既份量太多.......

唉....唔知喇.....
既然係咁,久唔時要再食得簡單d
希望唔好再重落去啦
(我已經唔期望自己會瘦得返)

所以呢,有時我都會煮吓通粉囉
咩話?通粉駛乜我教?
你地睇埋落去先啦
係....本身我係想煮餐肉通粉既
但我後尾醒起朋友幫我喺iherbs買咗支菜base返黎
又發現屋企仲有d洋蔥甘荀等等等既野
所以改咗整雜菜扭扭粉呀~~

估唔到支菜base幾好味呀
個扭扭粉老公食咗幾啖之後
大讚個湯底似華嫂個番茄湯底呀
有興趣既朋友都去訂返支返屋企試吓啦~~

材料 (2人份):
扭扭粉 130g
午餐肉 1罐(細罐)
甘荀 2條
洋蔥 半個
車厘茄 200g
露荀 12條
水 1L
vegetable base 4茶匙
橄欖油 1湯匙

做法:

1. 甘荀,露荀洗淨切粒,車厘茄開邊備用
2. 洋蔥去衣切條,餐肉切粒
3. 開中火加入橄欖油於煲中,滾油後加入洋蔥爆香
4. 加入甘荀炒2分鐘
5. 倒入水及vegetable base,煮滾後加入車厘茄,轉細火煮25分鐘
6. 轉中火加入扭扭粉煮8-9分鐘(加蓋)
7. 加入午餐肉及露荀粒,滾起後熄火加蓋焗5分鐘即成

<日式料理> 日式滑蛋雞肉飯 - 親子丼 (附食譜)

繼續唔煮中菜....
唔知老公會唔會掛住中菜呢?
哈哈,反正我問佢想食乜既話
佢都會答我話冇所謂架啦
所以我唔會理佢咁多架
我自己想食乜就整乜囉

我不嬲都鍾意食日本野架嘛
咁即係又係時候花d時間學吓整日本野啦
其實大家都知架啦
日本菜唔係淨係得壽司剌身架嘛

平時去d居酒屋食飯
都見到有好多唔同既小食同飯麵既
好啦,等我又慢慢遂樣學吓啦
當然我會試過味道ok先會同你地分享recipe啦~~

今次試整咗滑蛋雞肉飯(日本人叫既親子丼)
算係ok易整啦
不過個蛋面我煮耐咗少少
感覺唔夠滑漏呀
下次一倒隻蛋落去就熜火至得

材料(2人份):
白飯 2碗
雞扒 2塊
洋蔥 半個
雞蛋 3隻
日式醬油 3湯匙
味醂 5湯匙
料理酒 3湯匙
鰹魚粉 1小包
水 200ml
番茜 數條

做法:

1. 雞扒洗淨吸乾水份,用鹽,胡椒粉,麻油及糖醃15分鐘
2. 洋蔥去衣切絲備用
3. 雞蛋輕輕攪幾下(不必將蛋白蛋黃完全混合)
4. 水及鰹魚粉加入鑊中,以中火煮滾
5. 之後加入醬油,料理酒及味醂再煮滾
6. 加入洋蔥及雞肉,滾起後轉細火加蓋煮至雞肉熟透
7. 將蛋液淋上雞肉面,熄火加蓋焗15秒(我煮咗幾秒先熄火焗,但蛋似乎太熟了)
8. 於飯面淋上滑蛋雞肉,並加上番茜作裝飾即成

<西餅甜品> 芝士鬆餅 - Cheese Scone (附食譜)

好似好耐都冇喺屋企開壇作法喇
我唔係話煮飯喎
飯就差不多日日都煮架啦
我講緊喺屋企整麵包蛋糕呀~

其實自從天氣開始熱
我都冇開過爐做阿戊啦
唯一不變既係仲有去上麵包班囉
喺屋企喇喎....咁熱.....
咪即係喺廚房焗桑拿

屋企有貓貓又唔得開廚房門
如果唔係d包包餅餅實痴晒貓毛啦
即係就算廳開冷氣都冇用
咁我又點會願意整包包餅餅喎

咁何解我無啦啦又會整cheese scone呢?
理由永遠只得一個
因為我發現包低筋粉就到期囉
唔想嘥野咪焗住要整.....

呢個cheese scone係我之前喺工聯會學既
我係芝士怪,所以我覺得好好味呀
但.....你地整既話千期唔好跟足我recipe呀
因為整咗出黎好多架
即係相入面既size黎睇
有成廿幾粒架
人少少食既話份量減半都ok啦

材料:
低筋粉 280g
鮮奶 130g
牛油 130g
發粉 6g
鹽 2g
芝士碎 80g
芝士粉 2湯匙
雞蛋 1隻

做法:

1. 先將低筋粉過篩
2. 加入牛油,鹽及發粉後,用手將所有材料完全混合(會成一粒粒的)
3. 將搓好之粉粒倒於工作枱上,並於中間開一個大窿
4. 於窿中加入鮮奶,再用手將奶於粉粒搓勻(搓至粉團不痴手)
5. 芝士碎加入已搓好之粉團中並搓勻
6. 將搓好之麵團用保鮮紙包好,放入雪櫃雪30分鐘
7. 預熱焗爐180度
8. 雪好既麵團用匙羹分成多份,每個均做成圓形並放於焗盤上
9. 雞蛋打散,塗於麵團上
10. 最後於麵團上曬上芝士粉
11. 入爐焗15-18分鐘即成

<中華料理> 蒜蓉牛油雞翼 (附食譜)

 真係好似冇食中餐好多日喇
都係時候做返個中國人喇
其實我唔係唔鍾意食中菜
只不過係我唔食既野有太多
識整既野又太少啫

有時真係坐喺度諗幾個鍾
都完全諗唔到食乜好架
你地千期唔好叫我出去街市有咩買先決定整乜呀
我個人懶有計劃咁架
即係唔諗定先就出咗去
分分鐘行成粒鐘之後都空手而回架

好似今次咁.....食中餐喎....
諗到頭都大
最後......醒起冰格仲有一磅雞翼
咁不如就雞翼啦
(冇idea時我最鍾意就係清雪櫃
唔駛專登去買之餘又有得食,幾好)

不過雞翼都有好多整法既
開頭想瑞士雞翼架
但屋企好似唔夠材料做汁底
咁又諗不如就咁醃鹹佢煎啦
但我自己又唔多鍾意食
蜜糖雞翼又成日都食
最後決定又試新野
整蒜蓉牛油雞翼先

材料:
雞翼 12隻
魚露 3湯匙
料理酒 1湯匙
糖 半茶匙
胡椒粉 少許
牛油 30g
蒜蓉 2湯匙
檸檬草乾 少許
炸粉漿 適量

做法:

1. 雞翼洗淨抹乾,用魚露,糖,酒,胡椒粉及檸檬草乾醃1小時
2. 跟炸粉包裝指示加水開一碗炸粉漿
3. 燒一鍋油,雞翼沾上粉漿後放入油中炸至金黃
4. 用廚房紙吸去雞翼上多餘之油份
5. 細火用牛油起鑊,加入蒜蓉炒至金黃色
6. 加入雞翼回鑊撈勻即成

小貼士:
1. 炸粉我用日式炸粉如日清及昭和粉,各大日式超市有售
2. 如果想牛油味濃d,可於雞翼回鑊後再加牛油多炒一會才上碟

<韓式料理> 泡菜豆腐粉絲鍋 (附食譜)

未結婚仲喺粉嶺住既時候
成日都去幫襯屋企附近既一間韓國餐廳
佢地d野食係咪正宗我真係唔知
但我見老闆娘係韓文人
我諗幾唔正宗極都有個譜呱

但而家搬咗啦嘛
開頭都有試過特登揸車過去食
但呢兩年都冇去過lu....
專登去真係為食餐飯
又真係好似有d無聊既

不過我又真係好排住佢地d野食
泡菜餃子湯年糕
石頭飯,牛肋骨
全部都好好食呀~~~

既然唔過去食韓國野
咁不如又試吓自己整啦
我唔識整架
估吓估吓咁整啦
試吓整個豆腐鍋先啦~

材料:
豬腩片 200g
泡菜 半碗
豆腐 1盒
粉絲 1小束
甘荀 1條
洋蔥 半個
橄欖油 1湯匙
麻油 少許
辣椒粉 1茶匙
韓式辣醬 3湯匙
水 1L
雞湯粒 1粒
黑胡椒 少許

做法:

1. 豬腩片洗淨抹乾用基本野醃15分鐘(我用鹽,酒,麻油,糖及胡椒粉醃)
2. 豆腐切大件,洋蔥去衣切絲,甘荀切粒,粉絲浸水備用
3. 中火燒熱橄欖油,加入洋蔥爆香
4. 加入甘荀炒2-3分鐘
5. 再加入豬腩片炒熟
6. 加入泡菜及所有調味料(除水及雞湯粒)炒香
7. 倒入水煮滾並加入雞湯粒
8. 轉蚊滋火加蓋煮20分鐘
9. 轉中火加入豆腐滾起
10. 最後加入粉絲煮滾即成

<洋式料理> 香蒜火腿絲意粉 (附食譜)

哈哈,其實我真係好鍾意食意粉架
雖然睇落好似好簡單
整落又確實又係好容易
但我唔覺得會比煮飯快好多囉

點解咁講呢?
可能你真係會整得好快
但我整既話就一定唔快囉
因為.....我個人慢吖嘛
我整乜野都慢條斯理
好似雕花咁架.......

即係話無論我識整幾多野食
又或者整得幾好味都好
我只可以喺屋企慢吞吞咁煮俾老公食
開餐廳?永不可能
俾客鬧死都未有得食呀,咔咔

記得舊年開始學整麵包
初班第一堂既其中一款包
係蒜蓉包喎
咁阿sir當然會教埋我地點整個蒜蓉餡啦
自始之後,我就好鍾意用呢個蒜蓉餡黎整意粉囉~
今次既香蒜火腿絲意粉都係靠佢架喇

材料:
意粉 150g
火腿 3大片
青椒 半個
洋蔥 半個
露荀 5條
溶牛油 4湯匙
蒜蓉 2湯匙
雜香草 2茶匙
芝士粉 1茶匙
鹽 1/2茶匙
橄欖油 1湯匙

做法:

1. 火腿,洋蔥,青椒及露荀切條備用
2. 所有調味料(除橄欖油)撈勻備用
3. 煲一煲水,加鹽,水滾後加入意粉煮2分鐘
4. 熄火加蓋焗6分鐘,撈起意粉瀝乾水份
5. 細火用橄欖油起鑊,加入洋蔥炒香
6. 再加入火腿及露荀炒至金黃
7. 倒入意粉輕炒幾下,加入已撈勻之調味料炒勻
8. 最後加入青椒快炒一會即成

小貼士:
1. 150g意粉煮出黎唔夠兩個人食架,如果只煮一味意粉,最少用200g意粉
2. 溶牛油做法:可將牛油放入碗中,再將碗浸入熱水至牛油完全溶化或將碗放入已預熱之焗爐中(150度)
3. 將火腿改用肉碎,便成了香蒜肉絲意粉

<洋式料理> 醬燒豬仔骨 - BBQ Ribs (附食譜)

 

 

個人繼續病繼續冇精神
九唔搭八仲開始咳添
明明見熱氣食藥食得多燥先飲涼茶
點知又寒得滯咳?!?
殺死我罷......

病一病搞到我冇心機寫blog
積積埋埋好多食譜save咗喺個人腦度
不過就黎唔記得咁多喇
睇怕呢幾日都要努力d
寫返低晒出黎先得

呢排好似整咗好多西餐呀呵
表面睇黎係啦
其實中式野我都有煮架
不過整d太簡單既野就廢事post出黎啦
反正大家都應該識整
post出黎又冇人睇會唔開心架嘛~~

所以呢....我都係繼續share西餐食譜啦
今次黎個醬燒豬仔骨
查實我唔多食豬仔骨架
因為試過去意粉屋食
條骨有臭豬味既.....
但老公又好鍾意食喎
咁又即管試吓整啦.....

材料:
豬仔骨 1大條
燒烤醬 6湯匙
喼汁 2湯匙
茄汁 3湯匙
糖 2湯匙
蜜糖 2湯匙
白酒 1湯匙
百厘香 3-4條

做法:

1. 豬仔骨洗淨印乾水份備用
2. 將所有調味料(蜜糖除外)撈勻,並倒入保鮮袋中
3. 豬仔骨放入已有調味料之保鮮袋中,入雪櫃醃最少2日
4. 預熱焗爐180度
5. 豬仔骨用鍚紙包好,入爐焗30分鐘
6. 之前醃肉醬料加入蜜糖攪勻
7. 除去錫紙,將豬仔骨放於焗盤上,並掃上蜜糖燒烤醬入爐繼續焗
8. 之後每10分鐘再於豬仔骨的兩面塗上蜜糖燒烤醬再焗
9. 重覆以上步驟2-3次至豬仔骨完全熟透即成(約30-40分鐘)

小貼士:
1. 豬仔骨我喺Taste買得到
2. 燒烤醬於各大超市有售,不過真係要大間果d,細間好多時都冇

<日式料理> 日式咖哩野菜湯烏冬 (附食譜)

 

 

 

呢幾日真係病到死死地
今日都仲喺屋企攤屍中
乜都唔想做邊度都唔想去
明明開頭都只不過係發燒
點解之後會扁桃腺腫埋先?
一扁桃腺腫就痛埋上頭同眼度架喇喎

都算喇,食兩日藥應該冇事架
搞乜尋日仲開始瀉先?
我又有食錯野咩??????
點解點解點解?
病到我尋日同老公出街買餸
都買到黑面而回.....

其實我呢幾日病住都繼續有煮飯(好老婆)
餵到老公飽飽架
不過係冇心機寫blog囉
又儲起咗一堆餸排住隊等出post
好啦,家陣咁得閒坐喺度 (食咗藥竟然瞓唔到)
咁又繼續分享吓食譜啦

唔知大家記唔記得有間烏冬店叫赤丸
N年前一開既時候長期排長龍
想當年我都有做過傻仔
排成四五十分鐘隊
為既係一碗咖哩烏冬

而家我當然唔會排啦
見到條龍都掉頭走啦
(其實好耐都冇去過
唔知仲要唔要排隊)
要食咪自己整囉
簡單易做架
一個人時與其食公仔麵,不如整咖哩烏冬

材料 (1人前):
烏冬 1個
咖哩磚 4格
洋蔥 1/3個
甘荀 1條
水 400ml
橄欖油 1湯匙

做法:

1. 洋蔥去衣切條,甘荀洗淨切大粒
2. 中火用橄欖油起鑊,爆香洋蔥及甘荀
3. 加入水,滾起轉細火加蓋煮20分鐘
4. 放入咖哩磚煮5-10分鐘
5. 最後放入烏冬煮熟即成

小貼士:
1. 咖哩磚於各大日式超市有售, Aeon 12蚊店都有
2. 水既多少可自行加減,水多湯底會稀d囉
3. 除咗野菜,仲可以加肉類,好似牛同雞,如果牛既就最黎先落,如果雞就可以一開始同洋蔥甘荀一齊落

<洋式料理> 法式洋蔥湯 - French Onion Soup (附食譜)

上星期同朋友去咗工聯會上cooking class
學咗幾款唔同既法國菜
其中一款係法式洋蔥湯
見表妹同佢男朋友話上黎我屋企玩煮飯仔
一於活學活用
試吓整個洋蔥湯佢地試

其實之前我都有試過整法式洋蔥湯
當然自己整係上網參考人地既recipes啦
但估唔到個整法同我今次上堂學既都差幾遠喎
咁到底邊個既做法先至最正宗呢?
我諗我唔會知
除非我去法國搵個師傅教吓我啦,哈哈

不過咁....雖然我係去工聯會學
跟既亦唔係d咩大師傅
但阿sir話晒都係喺酒店學咗廚
就算唔正宗都好
整出黎既味道都係同平時喺出面飲既一樣囉

既然係咁既話
我今次梗係跟阿sir教既方法去整啦
起碼我自己鍾意隻味先啦~~
(佢地唔鍾意都冇計,我就自己先~)

材料 (4人份):
洋蔥 2-3個
橄欖油 3湯匙
清雞湯 1.5L
百厘香 3條
香葉 2塊
牛肉汁 10ml
蒜頭 1瓣
黑胡椒 少許
中型法包 1條
parmesan cheese 25g
gruyere cheese 25g

做法:

1. 洋蔥去衣切條備用
2. 蒜頭切片
3. 預熱焗爐150度
4. 法包切片,放於焗盤上入爐每面焗7分鐘至脆身
5. 芝士磨成芝士碎
6. 中火橄欖油起鑊,加入洋蔥炒至金黃色
7. 加入百厘香及香葉炒香,再倒入蒜片輕炒幾下
8. 加入清雞湯煮至大滾
9. 轉細火加蓋煲40分鐘
10. 倒入牛肉汁,試味(唔夠鹹可加鹽)
11. 熄火並灑上黑胡椒
12. 法包焗脆後轉180度
13. 於包面灑上芝士碎,入爐焗至芝士溶化
14. 最後將焗好之芝士法包放於湯面上即成

<洋式料理> 卡邦尼意粉 - Carbonara (附食譜)

 

 

卡邦尼意粉都可算係經典既意粉
真係去到世界唔同既角落都可以食到佢
而我呢個白汁人
就真係超鍾意食呢個意粉

即係同朋友出去食飯會嗌黎食
同老公出街撐枱腳時食
連去旅行食西餐時都會食
最經典既係去挪威時既平安夜
因為冇餐廳要自己煮野食時
我都喺Supermarket買Carbonara sauce煮佢黎食

咁鍾意食呢個意粉
又點可以唔自己學吓點整呢
又一次証明
以前喺街食到以為好好食又好難整既野
其實原來好簡單成本用好平
學識咗,以後仲駛俾成六七十蚊嗌碟意粉?
自己返屋企整好過啦~

材料 (2人份):
意粉 200g
洋蔥 半個
煙肉 4片
蛋黃 2隻
厚忌廉 75ml
鮮菇 80g
牛油 15g
芝士粉 少許
蕃茜 少許

做法:

1. 煲一煲水,加少許鹽,放入意粉中火煮2分鐘
2. 熄火,蓋上煲蓋,焗意粉6分鐘
3. 意粉瀝乾水份備用
4. 蛋黃打散,加入撈勻厚忌廉備用
5. 煙肉切粒,洋蔥切絲備用
6. 細火燒熱牛油,加入洋蔥炒香
7. 加入煙肉及鮮菇炒一陣
8. 再加入意粉炒勻並慢慢倒入蛋黃忌廉(期間不時攪拌)
9. 將蛋黃忌廉撈勻後可試味,唔夠味可自行加鹽
10. 上碟後灑上適量芝士粉
11. 最加於意粉上加上少許蕃茜即成

小貼士:
1. 煙肉本身有一定既鹹味,所以煮好意粉後要先試味才決定是否加鹽
2. 厚忌廉同淡忌廉唔同,厚忌廉質地較濃厚,比較能做出卡邦尼既杰身效果
3. 鮮菇可用自己喜歡的,我用既係日本本菇

<日式料理> 日式照燒雞扒 (附食譜)

早兩日執廚房時
見到有包博多拉麵就到期
快d拿拿聲煮埋黎食先
廢事一陣唔記得咗食
擺到過期要掉就唔好啦

尋日即刻整埋佢黎食囉
但食淨麵好齋架嘛
我平時通常會整多味餸
用黎送麵食囉

以前最鍾意就係整蜜糖腸仔架喇
哈，易整同快吖嘛
反正拉麵都係快餐類
所以配腸仔我覺得好好吖

本來今次都想整蜜糖腸仔架
後尾諗諗吓
突然醒起冰格仲有兩塊雞扒喎
咁不如整照燒雞扒啦
都一樣係甜甜地既野黎啫

材料：
雞扒 2塊
日式醬油 4湯匙
料理酒 2湯匙
味醂 2湯匙
糖 4茶匙
胡椒鹽 少許
麵粉 1茶匙
水 1茶匙

做法：

 

1. 雞扒洗淨抹乾，灑上少許胡椒鹽
2. 將所有調味料（除水及麵粉）撈勻並倒入保鮮袋內
3. 雞扒放入有調味料既保鮮袋內醃30分鐘
4. 預熱焗爐180度
5. 於烤架上塗上油，放上雞扒
6. 用焗盤(放下格)放少少水, 雞扒(放中間格)入爐焗15-18分鐘
7. 將之前醃肉既調味料落鑊煮滾
8. 麵粉及水撈勻，加入煮滾之汁料中
9. 煮至合適濃度，熄火
10. 將已焗好之雞扒切件，並淋上照燒汁即可

<洋式料理> 烤香草豬扒 (附食譜)

行開一田見到冰鮮豬扒
先發現原來我N年都整過豬扒啦
買兩塊豬扒返去煎都好喎
而且又可以用個LC Grill Pan
俾自己再好好練習一吓用Grill Pan既技巧

有咩技巧??
講緊煎格仔扒囉
明明見人地煎得好鬼靚
d格仔好分明架喎
但我上次用黎煎牛扒
Sorry呀,完全失敗囉
一個格仔都冇......

好啦,今次用豬扒再戰grill pan
又可以試下LC谷友大讚好用
大讚神奇既鹽麹黎醃吓塊豬扒
睇下係咪真係會令塊豬扒鬆軟d先

測試結果.....
驚喜欠奉....我食唔出塊豬扒有咩唔同
即係同用鹽醃口感一樣
係我唔識用??定真係冇分別架呢......

至於隔仔扒....
同樣宣告失敗
塊豬扒食得架,冇問題
係做唔到我想要既樣囉
到底係我每邊都煎得唔夠耐定係咩原因呢?
睇黎要繼續努力試喇~

材料:
豬扒 2塊 (約200g)
鹽麹 20g
百里香 數條
黑胡椒 少許

做法:

1. 豬扒洗淨吸乾水份
2. 將鹽麹及香草均勻塗於豬扒上醃30分鐘
3. 塗油燒熱grill pan至大熱(出晒白煙)
4. 放入豬扒煎分半鐘
5. 將豬扒轉90度放再煎分半鐘
6. 反轉豬扒,重覆步驟 (4)-(5)
7. 熄火,灑上黑胡椒及香草即成

<洋式料理> 芝士忌廉焗薯仔 (附食譜)

 

 

又到清鮮奶既時候......
我諗我下次去supermarket時
都係唔好再買奶住喇
唔飲鮮奶既我要成日清雪櫃d奶
真係諗到頭到大埋

我知,係自己衰囉
做乜去親supermarket都買奶先?
因為懶囉....
屋企附近冇supermarket嘛
便利店都起碼要行10分鐘先有喎
去開supermarket買開野梗一次過買埋啦

但....點解十次有九次都計算錯誤架
次次都用唔晒
個個禮拜都要清奶
燉奶食得多都會厭啦

好啦,今次用淨一盒啫
煮餸用鬼咗佢啦
用得奶黎煮
都係煮西式野啦
今次一於整個超罪惡肥死人既芝士忌廉焗薯仔先

係咪真係好罪惡先
又奶又忌廉又芝士
仲要用黎焗薯仔
超漏超肥呀~~
不過又真係好好食囉
久唔時罪過一次,無所謂啦~

材料:
薯仔 2個
鮮奶 125ml
忌廉 125ml
芝士碎 3湯匙
蒜蓉 1茶匙
牛油 15g
黑胡椒 少許
鹽 少許

做法:

1. 薯仔去皮切粒備用
2. 細火用牛酒起鑊,加入薯仔粒輕手炒2-3分鐘
3. 轉中火加入鮮奶及忌廉煮滾
4. 再加入蒜蓉煮至汁底杰身(期間不時攪拌)
5. 熄火,加入適量鹽及黑胡椒
6. 預熱焗爐200度
7. 忌廉薯仔上碗,於薯仔面上灑上芝士碎及黑胡椒
8. 入爐焗至芝士變金黃式即成

<洋式料理> 香草檸檬焗春雞 (附食譜)

 

唔知大家有冇留意
近排HSBC card holder去商場買書有折呀
我唔記得係7折定8折喇
總之有得平啦
好似去到6月9號就完喇

就係因為有得平
我呢個書怪咪又走去望吓
睇吓有咩抵買囉

咁我呢排好努力咁煮飯吖嘛
又唔想成日都淨係整中菜咁悶
都喺時候買d西餐既cook book
學吓點整多d野啦

係咁易打個轉又執到幾本cook book
返屋企即睇
仲好快咁決定埋試整乜野添
星期日即整埋

今次整咗焗春雞
本cook book其實係教人燒春雞既
for bbq用吖嘛
但屋企整又邊有得燒
所以咪試吓焗囉
同埋我都改咗少少個recipe先整呀

焗完出黎香噴噴
雞肉滑嘟嘟一d都唔鞋
配埋自家製醬汁點黎食
酸酸地好好味呀~~

材料:
春雞 2隻
檸檬 2個
百里香 數條
羅勒葉 十數片
黑胡椒 少許
原味乳酪 半杯
海盬 1湯匙

做法:

1. 春雞洗淨抹備用
2. 檸檬洗淨,皮磨成茸,另果肉榨汁
3. 於春雞內內外外塗上海鹽及檸檬汁 (1.5個檸檬份量)
4. 檸檬茸及香草塞進春雞內醃最少半小時
5. 預熱焗爐200度
6. 春雞放於焗盤上並灑上黑胡椒
7. 入爐每邊焗12-15分鐘即成
8. 另餘下之檸檬汁,以一比一份量加入原味乳酪,加少許香草及黑胡椒攪勻便成醬汁

小貼士:
1. 如果想雞皮脆口,可入爐前薄薄塗一層油
2. 焗既時間視乎雞既大細,我今次隻春雞較大,所以每邊焗咗16分鐘
3. 唔用新鮮香草可改用乾既雜香草,但用新鮮既真係香好多架

<洋式料理> 雜菌帶子意大利飯 (附食譜)

話說整雜菌湯嗰日
我一次過買咗成3盒菇架嘛
望住嗰幾盒菇既時候我就諗
咁多菇....淨係用黎整忌廉湯
應該用唔晒架喎....

咁用唔晒點搞?
仲可以整咩好呢?
定係雪返喺雪櫃
過兩日再整多次雜菌湯呢?

但我通常唔會短期內整多次相同既野架喎
膽粗粗諗試下用d菇黎整risotto啦
於是順手喺整個雜菌帶子意大利飯啦

我冇recipe喺手架
不過之前有整過其他味既risotto
相信做法應該都大同小異架啫
應該唔會唔食得呱
結果當然冇問題啦~

平時整risotto我會用LC 18 risotto黎整
今次改一改唔用risotto
轉咗用22 buffet整
效果一樣good good

材料:
意大利米 150g
雜菌 300g
帶子 300g
牛油 30g
蒜頭 2瓣
洋蔥 1/4個
清雞湯 400ml
白酒 15ml
迷迭香 2條
黑胡椒 少許

做法:

1. 意大利米洗淨用水浸最少30分鐘後,隔水備用
2. 雜菌洗淨吸乾水份備用
3. 洋蔥及蒜頭切粒備用
4. 細火用牛油10g起鑊,加入雜菌爆香
5. 已爆香之雜菌分兩份,其中一份放入攪拌機
6. 蒜頭及迷迭香(1條)放入攪拌機,與雜菌一同打成蓉備用
7. 細火用牛油10g起鑊,加入洋蔥炒香
8. 加入雜菌蓉炒幾下,加入意大利米炒勻
9. 加入白酒至酒精全部蒸發
10. 遂少加入雞湯,期間不時攪拌以免意大利米痴底
11. 意大利米煮15-20分鐘至合適軟硬口感
12.加入餘下既雜菌炒勻, 灑上黑胡椒,熄火
13. 煮飯期間另燒10g牛油,煎熟帶子
14. 帶子煮熟後灑上黑胡椒,放上意大利飯面
15. 最後加上迷迭香裝飾即成

<中華料理> 芥末籽蜜糖骨 (附食譜)

曾經有一輪我好鍾意焗蜜汁金沙骨
貪佢易整吖嘛
醃好晒就咁塞入焗爐焗熟就食得
但食多幾次之後
就開始厭厭地啦
因為始終用叉燒醬去醃
食得多都幾漏

於是停咗好一陣子冇再整過lu
直至前一排睇鬼嫁blog
見佢教人整芥末子蜜糖雞翼.....

明明我講緊金沙骨
咁又關雞翼咩事呢?
係咁既...我當日跟鬼嫁食譜整咗雞翼
老公大讚好味囉

咁我諗諗吓,咁大樽芥末籽醬
淨係整雞翼既話要食幾耐先清到支醬
又再諗諗吓隻醬用黎焗金沙骨都ok
於是自己改少少食譜
整咗呢個芥末籽蜜糖骨囉

材料:
金沙骨 1磅
芥末籽醬 3湯匙
蜜糖 3湯匙 (醃骨用)
蜜糖 2湯匙 (入爐前塗面用)
老抽 1茶匙
生抽 1湯匙
白酒 2茶匙
麻油 少許
胡椒粉 少許

做法:
1. 金沙骨洗淨吸乾水份
2. 將所有調味料撈勻並(除2湯匙蜜糖及白酒外)倒入保鮮袋
3. 金沙骨放入保鮮袋,放雪櫃醃過夜
4. 預熱焗爐200度,另將白酒加入已醃好之金沙骨中
5. 於焗盤上鋪上錫紙,放上金沙骨
6. 金沙骨入爐每邊焗15分鐘(底及面)
7. 焗爐轉220度
8. 於骨既兩面塗上蜜糖,再底面各焗5分鐘即成

<洋式料理> 雜菌忌廉湯 (附食譜)

前排喺面書見朋友整咗黑松露雜菌湯
見到好似好吸引
心思思又想自己試下整
難得而家有個blender喺屋企
梗係想用盡佢啦嘛

其實我唔食菇架(除咗金菇)
但我估雜菌湯我會接受到呱
到底有咩分別?有架!
我唔食菇係因為我唔鍾意咬落口時個texture
咁湯都攪爛晒d菇咯
咁咪可以入到口囉~

不過又有另一個問題
黑松露....朋友話加黑松露醬喎
樓上有我賣.....
但我果日實在拎住太多野喇
我無力再行去樓上買樽醬囉

唉,算罷啦
算既意思唔係我唔整個湯喎
而係唔加黑松露醬咋
我估就咁雜菌忌廉湯都應該好正

材料:
鮮雜菌 300g
淡忌廉 100ml
清雞湯 300ml
洋蔥 1/4個
蒜頭 2瓣
牛油 25g
迷迭香 1條
黑胡椒 少許

做法:

1. 鮮雜菌洗淨吸乾水份備用
2. 洋蔥及蒜頭去衣切粒
3. 細火加15g牛油起鑊,爆香雜菌及蒜頭
4. 已炒香的雜菌及蒜頭放入攪拌機,加入雞湯及迷迭香打至幼滑
5. 煲加入餘下牛油,爆香洋蔥
6. 加入已打滑既雜菌湯煮滾
7. 加入淡忌廉滾起後灑上黑胡椒
8. 上碗於湯面上加少少淡忌廉即成

小貼士:
1. 鍾意咩菌就用咩菌,我用咗白磨菇,秀珍菇同唔知叫咩名既日本菇
2. 迷迭香可以唔落或以乾既雜香草代替