<洋式料理> 碎蛋三文魚沙律 (附食譜)

哈,今次我完全搞錯了....
碎蛋三文魚沙律,乜鬼野黎架?!?
係咁既,上星期我真係諗到爆頭都唔知煮乜好
又唔想去街市
(我好怕去街市,又濕又迫,仲有好多車仔人)
咁好自然就要去超市啦~
之但係超市既選擇少之又少.....

咁.....咁.....我個腦就開始諗之前出街食過d乜野啦
突然醒起食過有碎蛋同三文魚既東西喎
咪自己懶醒買晒野返屋企整囉
整完食埋再返轉頭睇相
先知完全唔係嗰回事

你地見架啦張相
我張所有野炒埋一碟
仲整到懶靚咁一個圓形先放上碟
但原來.....我之前食到既.....
係分開上架!!!!!!!
即係三文魚還三文魚,碎蛋沙律還沙律囉
人地只係分開一層層咁疊起咋......

早知睇完張相先整啦....
唔知點解當時我會覺得係混埋一齊既?!?
不過又唔係唔好食既
我仲好鍾意食添....
咁我唯有當呢個係我既自創菜色啦~

材料:
三文魚刺身  6片
沙律菜  1碗
雞蛋  2隻
車厘茄  數粒
蛋黃醬  適量
英式芥辣  2茶匙
黑椒  少許
橄欖油  少許
黑醋  少許

做法:


1.  雞蛋加水煮10-12分鐘 (凍水放蛋)
2.  三文魚切細粒
3.  2/3碗沙律開切粒,車厘茄開邊備用
4.  煮熟雞蛋去殼,放入大碗中壓碎
5.  加入菜粒及三文魚粒撈勻
6.  再加入黑椒,芥辣及蛋黃醬攪勻
7.  拌好之沙律放入圓形小杯中,放入雪櫃雪30分鐘
8.  取出沙律杯,倒轉放於碟上
9.  將餘下之沙律菜及車厘茄放於碟邊,加上黑醋及橄欖油,取走圓形杯即成