上星期去開深水埗
當然要去一去樹記買d腐竹啦
我見d人講到佢地好巴閉好出名咁架
老實講,我細個都係喺深水埗住
仲要住喺同樹記同一條街
落樓行多幾個舖位就係樹記啦
點解我對呢間野一d印象都冇架呢?
好似話係老舖已經開咗好多年架.....
我唔知喇,可能我細個時唔會買腐竹所以冇留意呱
總之一去到時門口係排長龍的
見要排隊本黎想走的
但見條龍都係三幾十人,排就排啦
企定定聽人講先知原來算少人了
好多時條隊都好長要排成個鐘的
聽到d人咁講,即刻買多少少野試下有咩咁正
我呢...買咗d腐皮囉~
一買既時候已經諗住買返黎整腐皮卷架喇
一塊$3.5好大塊圓碌碌的
姐姐話一塊可以開8小塊喎
唔....圓形點分8塊呢?
整腐皮卷塊野唔係應該長方形咩
定係我要剪走晒d圓邊走? (咪好嘥囉)
最後我亂咁剪囉.....
整腐皮卷當然要有蝦啦
我唔知出面酒樓用咩蝦架
整嗰日我喺街市見到有赤米蝦
細細隻一件可以包幾隻,都好似ok嘛
赤米蝦好細好細隻的
細隻過基圍蝦,d人話白灼好味喎
但我唔多鍾意白灼蝦的
照用黎整腐皮卷好了~~
唔...仲有呀...
d蝦咁細隻...如果大家整時都係用赤米蝦
咁你地就自己決定挑唔挑腸喇~
雖然我家主人話唔駛挑既
但我自己整時就有挑
因為d蝦腸真係好污嘈喎
不過就挑到眼曚囉,d蝦細隻嘛~
材料:
赤米蝦 3x隻
腐皮 8小塊
半肥瘦肉碎 150g
韮黃 數條
甘荀絲 少許
喼汁/沙律醬 適量
調味料:
鹽 半茶匙
糖 1/4茶匙
麻油 1茶匙
紹酒 1茶匙
粟粉 1 1/2茶匙
胡椒粉 少許
五香粉 少許
麵漿:
麵粉 1茶匙
水 1湯匙
廚具:
電炸鍋
做法:
1. 蝦放入雪櫃雪2小時,取出後去殼挑腸
2. 將已挑好腸既蝦肉啤一啤水
3. 蝦肉加入肉碎,放入調味料醃30分鐘
4. 麵粉及水攪勻備用
5. 腐皮平放桌上,放上適量蝦肉及肉碎
6. 再放上適量韮黃及甘荀絲
7. 先將左右兩邊向中間摺,之後再由下至上卷好腐皮,用麵漿封口
8. 油加入炸鍋中,以180度預熱
9. 油滾後放入腐皮卷炸4-5分鐘至金黃即成
10. 食時可拌以喼汁或沙律醬
維記咖啡粉麵...好多人都去食過啦
我呢...都算係由細食到大的
因為我中學時喺又一村返學嘛
久唔時lunch time都會同d同學打的去維記食lunch的
當然啦...當時既維記邊有而家咁多人去食吖
同埋邊有而家咁靚咁乾淨喎
以前係舊舖搭埋出出面街
好大排檔feel架~~
唔知由幾時開始
維記突然間好似變咗好出名咁
我估都係資訊科技發達既關係啦
大家上網一search就知邊度有好野食
自自然然多咗好多人識維記啦~
出咗名多咗人幫襯老闆就梗開心啦
日日做到冇停手
星期六日假期勁多外區人過黎食麵
仲要排晒長龍嗰隻喎
我試過一兩次都唔想再去了
佢地新舖排一條隊舊舖又排一條隊
咁想點吖,即係我早到都唔一定有位先喎
咁煩我寧願唔食囉
咁啱上星期老公開始要清假
難得平日放假喎
即刻走去維記食返碗麵先啦~
平日真係好好多呀
唔駛排隊等餐死
lunch time去到都即刻有位
下次都係等平日得閒先出去食好了~~
人地最出名既係豬潤麵
但老公唔食豬潤的,我食但又唔特別鍾意
所以都係食餐牛麵好了
不過我覺得都貴喎,一碗麵都成本$3x蚊
想當年食...十零蚊之嘛
貴咗成陪有多,又唔見人工多咗一陪.....
話時話吖,雖然我唔記得當年既牛肉麵係咩味
但總係覺得以前好似好味d咁~
今次再食...唔識講....總之就差咁d
仲有...餐肉好鹹囉!!
除咗麵我地仲嗌咗個咖央多士
本身想嗌咖央西多架
不過又要切又要用叉食好麻煩
所以都係要多士啦,用手拎起就食得~
(好彩冇嗌,同枱有人嗌咗但個賣相好衰吓囉)
咖央多好味,個咖央唔太甜食落口啱啱好
我鍾意佢多過個麵囉~
兩碗麵兩杯凍檸茶加件多士
埋單$102
其實呢個價錢食餐飯都係合理既
去邊度食都要啦~
但心底裡依然覺得唔抵的
食公仔麵之嘛...自己煮係咪一定唔駛成舊水先~
不過算啦,當係返黎重拾童年回憶啦
2013年10月11日
離開酒店既時候天氣開始越黎越差
我地仲去唔去豐平峽好呢?
唔去既話可以去邊?
喺完全冇idea既情況之下
我地決定繼續原來既行程
可能去到定山溪既天氣又唔同呢?
由於車程都要兩個多小時
中途我地都有去休息站抖吓
有去過日本既朋友都應該知日本公路常有休息站架啦
而且大部份都設備完善
除咗有洗手間之外仲有野食野飲賣
當日落住雨天氣都幾凍
我地都忍唔住買返兩杯熱野飲
保暖保暖嘛~~
休息完繼續我地既行程
雨越落越大,似乎一d好轉既機會都無囉
咁點算?正當心裡面諗緊好唔好改去outlet既時候
一出公路口就俾我見到Mitsui Outlet Park
yeah...原本plan咗聽日先去呢個outlet既
既然天氣咁差...就改呢日去咗outlet先啦~
可能聽日既天氣會好返呢~
就係咁...我地去咗shopping囉
而家既我去濕平時...會睇師奶野囉
係...都會買少少衫既
但主力會去睇廚具囉
Le Creuset, Franc Franc,仲有d不知名賣日式碗碟既shops
我都行得不知幾開心
幾乎樣樣都想買返黎香港呀~~
最後當然收穫豐富啦
買晒想買既野,我地先去食lunch
喺outlet都冇乜選擇架喇
去food court囉
左睇右睇都唔多啱心水
最後決定食燒豚肉飯算
老公要咗有4塊肉既豚丼 (890円)
我就要咗ネギ豚丼 (790円)
汽水另加100円
味道都ok啦,又唔貴既,係咁上下囉~~
食飽之後我地都離開outlet囉
因為其實個outlet都唔係大
好快都行完了
離開時天氣依然好差
雖然係早咗少少,但我地都決定早d去札幌
先還車再到酒店check in
其實都好方便
我地喺札幌會住Keio Plaza Sapporo (京王プラザホテル札幌)
咁啱酒店商場有Toyota
還完車直接行返上lobby check in就得
唔駛拎住d行李四圍走~
但我地大頭蝦囉,之前自己拎咗個大鏡擺車用
還車時唔記得拎返走呀~
京王プラザホテル札幌,一晚HK$1,300
呢間酒店我地已經係第三次住
次次去親札幌都係住呢度
其實都算好近JR站
酒店行去JR站應該唔駛10分鐘
而且d房都夠大,就算semi double房都唔太細
房入面仲有按摩椅添~~
check in完hea咗一陣又再出動
有咩好做,繼續行街shopping囉
我要去百貨公司呀
因為我要去Le Creuset買bear bear 碟呀
仲要去行富澤商店睇廚房野~
行吓行吓都已經成9點
好啦,搵地方食晚飯先...
本黎諗住去札幌かに本家食蟹
點知去到時....俾人包咗場喎....
冇得食...於是去其他商場搵野食啦
某食街d餐廳明明話收11點架嘛
點解間間唔係閂咗就last order咗先?
最後搵到有仲開門既餐廳
竟然又話冇野食架喇,只有甜品喎
搞錯呀,札幌都係大城市黎架
由於我地唔想搭車出去搵食
最後唯有喺JR站附近買芝士撻食啦
估唔好又好好味喎
好味到我有衝動買d返黎香港食架
(我最後唔記得咗買囉)
幾個撻仔又點會夠飽吖~
我地返到酒店時...嗌room service囉
一個pizza同一個肉醬意粉
pizza味道ok,但個意粉就....
sorry,都好難食吓囉
聽日真係要早d去食飯
我唔要再嗌room service呀 >.<
好似好耐都冇整過西式野食了
近期成日都喺面書見到某朋友成日整意粉
仲要整到好鬼靚
挑起我條筋搞到我又好想整添
不過我梗係冇人整得咁靚啦~
其實呢,整意粉我來來去去都係整嗰d架咋
因為我本身唔太鍾意茄汁底
黑椒汁都可以既,不過又唔係我首選
磨菇汁...我唔食磨菇架...
由於我個人麻鬼煩
通常整都係白汁同忌廉汁囉~~
我知,我鍾意咗兩隻最肥既汁
大家俾多少少時間我啦
我會開始接受吓其他汁
整多d唔同口味既pasta出黎同大家share~
但現階段...白汁同忌廉汁啦
係肥...但好好味喔~
今次整完呢個意粉
我好想知道有冇人自己整煙三文魚架?
因為出去買好貴喎
我喺一田買咗pack 100g既煙三魚
好似要成七十幾八十蚊
但一開入面得三片三文魚咋.....
真係好貴喎....如果自己識整就好喇....
除咗三文魚,今次仲加咗蟹肉呀
又係之前喺樂天買既Oh!Gle罐頭蟹肉呀
買咗咁多罐,快d食晒佢嘛
同埋蟹肉同忌廉汁太夾喇
加上呢隻係紅腳蟹肉
紅色既蟹肉加白色忌廉汁
整完出黎咪好靚囉~~
材料:
意粉 200g
煙三文魚 100g
罐頭蟹肉 1罐 (135g)
洋蔥 半個
淡忌廉 200ml
調味料:
牛油 10g
白酒 1湯匙
蒜蓉 1茶匙
黑椒 少許
鹽 少許
雜香草 少許
麵粉 15-20g
水 3湯匙
廚具:
Le Creuset 22cm Round French Oven
做法:
1. 洋蔥去衣切絲備用
2. 煲一煲水,中火加入意粉煮2分鐘,熄火加蓋焗6分鐘
3. 意粉盛起過一過冷河
4. 細火加入牛油起鑊,爆香洋蔥後加入蟹肉炒一會 (1分鐘)
5. 加入蒜蓉炒勻
6. 灑上少許黑椒,鹽,白酒及雜香草炒勻後,倒入淡忌廉煮滾
7. 麵粉及水攪勻,逐少加入忌廉汁中 (邊煮邊攪拌)
8. 忌廉汁煮至適合濃度時,放入意粉拌勻,熄火
9. 意粉上碟後,放上煙三文魚,再灑上黑椒即成
人年紀大咗d口味真係會變既
以前有好多唔食既野
大大吓唔知點解會由唔食變咗食
再極端d可能係由唔食變到好鍾意......
咁...當自己口味轉變時
係咪即係話我越黎越老呢?!?
做乜突然間咁講呢?
係咁既...我細個時好唔鍾意飲湯架
雖然屋企定時定候都會煲湯
而且煲既湯都尚算多元化
但係...我就係無辦法愛上飲湯
最多都係勉強飲一碗架咋~
所以呢,結咗婚之後我真係好少煲湯
有時真係可以幾個月先煲一次
反正我家主人都一樣唔多飲湯架啦
我煲唔煲湯佢都覺得無所謂的
起碼我肯定佢對我唔煲湯係唔會有怨言囉
不過我呢幾個月突然間鍾意咗飲湯喎
唔通真係同Le Creuset有關?!?
買咗靚靚湯煲要用盡佢?
因為個煲大所以煲多咗要飲晒佢?
定係用LC煲煲湯好味d所以飲多咗?!?
我都唔知呀...
總之突然覺得飲湯飲多咗個人好似健康咗
冬天時手腳冰冷既情況冇咁嚴重囉
就係咁我無啦啦變咗湯怪~~
明明星期六返嫲嫲度食飯都飲咗湯
估唔到我星期日又心思思想煲湯
仲真係走咗去街市買料煲添
仲唔係湯怪?!?
不過咁,我只係煲簡單野咋
青紅蘿蔔豬骨湯,簡單又好味
最重要既係老公都鍾意飲嘛
又再煲落大大煲湯分兩日飲囉~~
(我一晚飲咗3碗呀,勁!)
材料:
紅蘿蔔 2個
青蘿蔔 1個
豬骨/瘦肉 適量 (我買咗40蚊煲湯豬骨)
蜜棗 2-3粒
水 2L
調味料:
鹽 適量
廚具:
Le Creuset 29cm Oval French Oven
做法:
1. 青紅蘿蔔去皮洗淨切件備用
2. 豬骨先汆水,再用清水沖一沖
3. 將所有材料放入煲中,注入清水開中火加蓋煲滾
4. 之後轉細火,加蓋煲1.5小時
5. 熄火焗2-3小時
6. 再開中火煲滾後轉細火煲30分鐘
7. 加入鹽調味拌勻即成
2013年10月11日
唉....好天咗一日之後又陰陰天
晨咁早起身見到唔好天都真係幾唔開心
點解呢?我地山長水遠揸幾個鐘頭車黎トマム
目的只有一個--就係睇雲海
我地天未光四點幾起身
等到五點幾搭shuttle去纜車站
就係希望去雲海テラス見到呢個咁靚既景色...
(更多資料: http://www.snowtomamu.jp/summer/unkai/detail.php)
但係...我地迫餐死排餐矇...
再每人俾咗1,900円纜車錢
最後....乜都睇唔到囉
天氣絕對有影響啦,呢日天陰陰
d雲好多好厚,到天光之後d雲一直都唔散
即使上咗山,依然能見到極低
你地睇吓相就知啦...乜都睇唔到吖
見到咁...我地依然唔憤氣的
一直希望晏少少可能會好d
於是唯有等,就算覺得凍都唔走
最多買杯熱朱古力坐低等
期望有奇蹟出現
當然我地係等唔到的
仲見到有職員拎住個"雲中"紙牌叫遊客影相囉.....
其實到咗雲海Terrace係有個郵筒
睇唔到雲海大家都可以寄張明信片返屋企啦
排隊上纜車前,職員會俾一張明信片你
咁大家寫完就可以掉落郵筒喇
唔駛搵郵票買架,唔駛郵票的
寫完直接放入雲海テラス啦~
順便一提
又要再讚日本人既細心
上咗山之後氣溫的確低了不少
眼見好多遊客都著唔夠衫的
所以上到山之後
係有大褸借架,仲係免費添架
真係著唔夠衫都唔駛擔心呀~~
睇唔到雲海,落返地面之後
我地冇等酒店shuttle喇
望落都唔遠,慢慢行返酒店啦
估唔到沿途既景色還算不錯
仲意外地見到紅葉添....
雖然都開始落葉了
但見到滿地紅葉都一樣好開心吖
同紅葉影完相
我地就要趕住返去食早餐了
同晚餐一樣,酒店只會俾餐券你 (每張面值1,575円)
想去邊間餐廳食就自己決定啦~
之前睇咗一輪
我地揀咗森のレストラン
想感受一吓望住森林食野既感覺嘛~~
講真望住咁多樹黎食早餐又真係幾relax既~~
但如果有太陽伯伯仲relax囉
至於食物方面喇喎...雖然係buffet
我覺得冇咩揀冇乜野啱食囉
因為好多都係傳統日本人早餐會食既野
好似飯呀,漬物呀,燒魚呀.....
全部我都唔多食既
不過又未至於完全冇野食,都食得飽既~~
食飽早餐,都要返房執行李準備離開了
喺呢個時候天氣亦開始轉差
過多一陣仲開始落雨添
喺房望出去,見到出面灰朦朦
都即刻個心一沉
我地plan咗一陣去定山溪既豐平峽架喎
落雨....仲去唔去好呀?!?
去唔去都好啦,都夠鐘check out了
所有野上咗車之後再作打算啦~ (續)
好耐之前已經想加多個"食遍香港"既分類架喇
因為除咗鍾意煮野食之外
我都鍾意食野架嘛
同埋我平時出街食飯都一定影低d食物相
(即係一開飯時...電話食先,影影影)
咁既然都有影相既習慣
食完返黎同大家share都好吖
好味既大家就多個新選擇
唔好食既都可以俾個心理準備大家
免得過都唔好去幫襯嘛~~
可惜我懶囉....
之前影埋影埋好多食物相
但係一張都冇喺度出現過
鬼咩!我連自己煮果d都post唔晒出黎
邊得閒搞其他野吖......
(我d遊記又排長龍,敗家野都好耐冇出現過....)
不過咁排法都唔係辦法
由今日開始
我決定隨心!!取消排隊制
總之我想寫乜就寫乜啦~
朋友們如果喺面書見到我整既餸想學而又冇寫blog
可以私下同我講聲
我會盡可能滿足大家後補返recipe的~~
講返今日個lunch
元朗近排新開咗間麻辣米線叫雲味園
喺貓山皇隔離的
另喺屯門康德有分店
我第一次食就係食屯門嗰間
見元朗都開咗,即刻走去試食啦~~
一個兩餸米線加一杯凍飲$39
真係唔算平的
但而家百物騰貴
去邊度食野都貴架喇,除咗自己返屋企煮架啫
所以都唔好投訴咁多了
雲味園既米線湯底有3種選擇
麻辣,酸辣同清湯底
我只食過麻辣,基本上都可以的
今日食麻辣雞豬頸肉麻辣米線
麻辣雞係佢地既推介
我見好多客都有點的
但我個人認為豬頸肉更香更好味
可能我唔大鍾意大大舊雞柳肉啦
開頭我以為係用冰鮮雞的
味度冇問題的,只係我怕佢啖啖肉囉......
至於湯底...我唔識分有冇味精架
我鍾意係因為佢個麻辣似食川菜既麻辣
平時譚仔既麻辣,湯面係浮住d辣椒粉咁架嘛
好似用粉沖出黎咁,我唔鍾意囉
但雲味園呢個湯底
真係見到有辣椒皮的
而且食落口亦夠麻.....所以我鍾意~
提提大家佢個小辣唔多辣的
愛辣朋友至少要點中辣喔
真係不得不讚吓自己
平時星期六日上晝我好少煮飯架
多數都係出街食又或者嗌外賣
但係呢...我竟然連續兩個星期六都有煮lunch囉
真係連我自己都有d唔相信呀
咁乖係咪真係抵讚吖~~
今個星期六整咗個日式咖哩牛肋條
呢個餸又係可以送大大碗飯黎食喎
日式咖哩既好處係一d都唔辣
就算我今次買咗辛口(即係辣)既咖哩磚
個餸整完出黎仍然一d都冇辣味
啱晒唔多食辣既老公呀!
平時炆牛肋條通常都炆好耐
兩個多鐘頭真係唔少得
但係如果炆兩個幾鐘既話
我咪要一早起身準備?!?
唔好啦......我唔想10點鐘就喺廚房準備lunch喎
所以今次偷懶
快快脆加少少可樂落去炆
咁就可以慳返d時間啦
反正日式咖哩本身都甜甜地架啦
加少少可樂可以令牛肋條快d林嘛
咁我咪可以遲d先開始煮飯囉~
咁當然啦,如果你想炆到d牛入口溶化既
好似我今次咁整係唔得架
要好林好林呢,都係炆返長d時間啦
我呢次係懶人版
整完出黎牛牛係林,但唔係勁林架
不過就快整好囉
材料:
牛肋條 300g
甘荀 2條
洋蔥 2/3個
日本本菇 半包
日本大蔥 1條
蒜蓉 1茶匙
香葉 3-4片
汁料:
水 700ml
可樂 100ml
咖哩磚 1盒
廚具:
BIS 20cm Round French Oven (Black Interior, 炒本菇用)
Le Creuset 22cm Round French Oven
做法:
1. 牛肋條用廚房紙吸乾血水備用
2. 甘荀去皮切件,洋蔥去衣切條,本菇洗淨備用
3. 日本大蔥2/3條切條,1/3條切細粒
4. 1湯匙油中火起鑊,加入牛肋條輕輕煎一煎後盛起(1-2分鐘)
5. 將洋蔥及甘荀放入煲中爆香,將牛肋條回鑊炒勻
6. 加入清水,水滾後轉細火,放入香葉加蓋炆40分鐘
7. 再用2茶匙油中火起鑊,爆香蒜蓉及大蔥 (蔥粒先留起)
8. 加入本菇炒熟,盛起
9. 轉中火將炒好之本菇加入牛肋條鍋中,滾起後加入可樂,轉細火加蓋煮5分鐘
10. 加入咖哩磚邊攪拌至咖哩磚完全溶化後,加蓋煮10分鐘
11. 熄火焗15分鐘,上碟後灑上蔥化即成
