<踏足北海道> 8日悠遊走之Day 3 - Part II

2013年10月8日

上回講到我地去咗アイヌコタン (愛奴部落)
之後呢仲有一個地方係plan咗要去既
嘻,就係去オンネトー囉
(map code: 783 791 050)
我唔知有咩睇架
不過之前睇旅遊書見好似幾靚
而且喺阿寒湖揸車去只係2x分鐘
所以即管又去吓囉


其實我地冇跟足個GPS
因為差唔多到時,突然見有個位都有d人停低
加上又有位泊車
我地又唔理咁多停車望吓囉~
一落車行前多幾步
又真係幾鬼靚喎
雖然唔係紅葉遍遍
但望住個湖加埋d樹,都幾舒服吖


停低十零分鐘之後繼續開車行入d
因為我睇書入面既相同我頭先見到既景色唔多一樣
於是我覺得應該仲有個觀景台的
所以決定行入d再望吓
果然再多兩三分鐘車程就俾我地見到喇
呢個位望埋去仲靚呀
可惜天氣唔多好吖
如果加埋個藍天一定好靚囉~~


離開オンネトー之後就到酒店check in
呢晚好好好豪住阿寒湖温泉あかん鶴雅別荘鄙の座
好貴呀, 一晚要成71,700円
成間酒店只有25間房
房少價錢貴就當然好service啦
呢間酒店係我咁大個女以黎住得最貴既一間
亦係我最鍾意既一間囉

講返service有幾好?
一去到check in時當然有welcome drink啦
仲有杯cream brulee個我地食添
跟住未入房前好細心咁問清楚我地有d咩係唔食既
唔食既野佢地會改返個餐單黎就我地架
哈,我當時只係話我唔食熟既魚
結果我既晚餐同第日既早餐當然係冇魚魚啦
老公嗰份就有囉


之後揀好浴衣就帶我地入房
我地住201號房
一入到去我真係呆咗
唔....冇諗過原來間房咁大....
係,其實喺樂天book房時係有寫明間房幾大既
但我冇呢d idea架嘛....總之就係大啦~


大之餘仲好好設備
有私人風呂啦,仲要向住阿寒湖的
有按摩椅.....有free drink (唔少架,除咗水仲有可樂呀茶呀....)
仲有free ice cream添
連咖啡機都有,CD機又有
除咗基本既皂液之外,連gel頭野都有
真係好似自己屋企一樣呀~


喺房hea咗一陣就夠鐘食飯喇
順帶一提,晚飯後lobby係免費供應飯同麵豉湯既
我地個plan係喺自己房食既
由於佢一個個餸咁上
我就廢事擺幾廿張相出黎啦
係咁易擺幾張出黎算了
overall餐飯都算唔錯的


食飽仲有甜品,佢一解釋完.....
用蘋果焗既?!?我....我唔食煮過既生果架
但我又真係冇同佢地講話我唔食
當時諗住算啦食少樣囉,反正都好飽
估唔到佢地一聽見我唔食仲緊張過我
即刻走去廚房問有冇其他野
confirm埋我食唔食之後先俾我囉
搞到我都好唔好意思添


食飽抖返一輪即刻浸溫泉啦
唔好嘥咗個私人露天風呂嘛
大家記住呀,唔好一食飽即刻浸溫泉呀
唔好架,一定要抖夠先好去浸呀
浸完我地都要瞓了,早抖~~