呢日天氣好差
最後搞到我地既行程亂晒
起身食完早餐就離開間靚靚酒店了
之前冇影低酒店外觀
所以呢日補返數啦~
講返個早餐啦
佢地真係好鬼細心
之前我咪話我唔食魚既
佢地又將早餐有魚既都改晒囉
所以我份早餐好離奇地有煙肉煎蛋架
仲有呀,之前果晚個有蘋果既甜品我唔食
酒店以為我完全唔食蘋果
所以將杯有蘋果既雜果汁抽起咗
換咗杯橙汁俾我架
真係好欣賞佢地咁鬼貼心~~
食飽早餐離開咗酒店
我地就出發去坐阿寒湖觀光船
船程大約85分鐘
途中會停一停マリモ觀察センター
船飛連入場卷每位1,850円
呢呢呢,我地就係坐呢隻船架喇
一開頭我地懶勁咁坐船尾冇窗既位
嘩,坐多一陣發覺唔掂囉,好大風
都係坐返入船倉好d
但如果要影相既都係要出去啦
d窗咁鬼污漕邊影到相吖~~
不過相...都係影得唔靚架喇
個天灰灰暗暗咁
冇藍天影乜都唔靚啦
喺呢d時候我一如以往口裡不停話點解咁架
點解去親旅行都唔好天先?
如果有藍天會靚好多囉....
頭先講過船程中途會停マリモ展示觀察センター
マリモ,即係綠球藻
當地人相信マリモ能帶給人幸福
其實個centre有咩睇?
冇架,好似水族館咁囉
人地用魚缸養魚,佢地就用黎養住d大大細細既マリモ
有d好大個架,大過個人頭都有呀~~
轉個眼就坐完程船
時間尚早,我地又想等到下午1點
睇埋個一年一度既マリモ祭先離開阿寒湖
於是我地去行吓手信店
之後再去レストラン汽船食個lunch
個lunch出晒事啦
老公好醒咁叫咗個燒豚丼
我呢...見佢推介個阿寒やきとり丼
我開頭以為やき係燒とり係雞,即係燒雞飯
見到個飯時都未知出事
仲見到有張說明紙教你食邊樣先
點知食咗一啖就知瀨野
嘩....好鬼酥囉....咩黎架?
Er....原來係鹿肉黎架
嗚,我唔食架喎,咁點呀?!?
最後......當然係我最愛既老公大人幫我食咗啦~
食飽飯差唔多一點
即刻走出大街等巡遊啦
但一路行一路行...點解一d動靜都冇既?!?
人影都唔多隻喎,到底咩事先?
唔好話我知因為落雨cancel咗呀?!?
諗諗吓,頭先有警車行過仲有廣播添架喎
似乎真係因天氣問題取消咗喇
我地街頭行都街尾,再街尾行返去街頭都冇動靜
有冇咁黑仔呀....嗚....早知唔等啦~
離開阿寒湖,我地就向摩周湖進發
不過咁既天氣,我都冇乜expectation了
都係到此一遊架啫
從阿寒湖到摩周湖車程約50分鐘
(map code: 613-781-459)
有停車場,不過要俾錢,每車400円
去到時天氣更差
一直落住大雨,想影張靚相都難
估唔到天氣咁差但都有好多人 (好多學生)
天氣唔好,感受唔到平時喺旅遊書上既美景
落住雨個人都冇心機
快手快腳行個圈都走人了
原本plan咗去細岡睇日落的
不過咁既天氣....算罷啦.....
都唔會見到太陽伯伯架啦
早d去酒店check in算
之前住咗晚貴酒店,呢晚就住平架喇
Comfort Hotel釧路 (map code: 149 256 314)
酒店隔離有多層停車場,好似500円 (唔係好記得了)
一晚冇早餐6,000円
咁既價錢當然唔好要求多多啦
總之都算乾淨都算係咁了
check in完漫無目的咁行
最後好求其咁去咗食拉麵
拉麵店名叫河むら
個麵幾好味,起碼好食過我喺阿寒湖同旭川食嗰碗
價錢好似都係700-800円左右一碗啦,正常價
食飽行返去車站附近
全日不停落雨
又係想行都冇心機再行落去
最後喺JR站買d野飲
再買咗條抹茶roll就返酒店了
(註: 條roll都ok好味的,不過我地太飽了,食唔晒)
沒有留言:
張貼留言