2013年10月10日
北海道既天氣真係好反常
之前果日明明落雨落足成日
點知第二日超級好天
藍天出現萬里無雲
仲有太陽伯伯陪我地,人都心情靚d呀
我地一早起身落樓下食個輕食早餐
(真係輕食,都冇咩野食俾你揀)
就check out離開酒店喇~~
(臨走前又離遠影吓酒店先)
由於停車場同酒店係有聯系既
所以check out時順便同酒店職員講聲
之後就可以坐定喺lobby
到架車運返落黎時佢地會再通知你過停車場拎車囉
點解我會話運返落黎呢?
係咁既...隔離果個係多層停車場嘛
香港多層停車場就自己揸架車上去轉到你頭暈
但北海道唔係架喎
見唔見上面張相有個圓形?
嗱...泊車時我地要做既係將架車駛去個圓形入面
之後佢地會轉到你個車頭對住個類似門既門
跟住開門叫你揸入去
去到盡頭會叫你落車
之後升間車上上層車架度~
到拎車時又送返架車落黎咁囉.....
拎返車之後我地既第一站係丹頂鶴自然公園
(map code: 630-504-607)
由酒店出發車程大概30分鐘
公園附設免費停車場
你地睇,沿途見到個藍天
心裡面就諗如果呢日先去摩周湖就好喇
可惜我地冇咁多時間再返去睇吓啦....
話咁快我地就去到丹頂鶴自然公園
入埸費每位460円
公園入面其實唔係好大
裡面有既咪就係丹頂鶴
雀呢家野,真係佢識我我唔識佢呀
不過不得不讚公園既設計喎
平時我地去d動物園呢,用籠困住d動物係好正常吖
咁如果要影相就自己就位避開d網啦
但呢度呢...專登開個位俾你影相架
只要揭開呢塊鶴形板就可以伸個相機入去影相
影完蓋返好塊板就可以了
不過呢...有d人好鬼冇公德心囉
仲要係香港人添呀
我見到有香港旅行團既人揭起咗塊板唔整返好佢囉
我知...隻鶴咁大隻唔會喺個窿度出到黎
但都唔係咁冇手尾架?!?
仲有呀,同一團人呀
我見佢地有人去完washroom洗完手唔閂水喉囉
要我幫佢執手尾喎
唔駛你交水費都唔好咁浪費吖
其實香港人成日話大陸d自由神點唔好點唔好
咁佢地自己去旅行時d行為咪一樣咁衰!!!!
唔講d唔開心既野喇
總之我好欣賞日本人既細心啦
如果唔係有個影相窿
可能我影唔到呢幾張靚相喎
(自我淘醉中,其實果幾張相無技巧可言)
行完公園,我地再去埋附近既釧路市湿原展望台
(map code:149-548-534)
同丹頂鶴自然公園一樣有free parking
車程約15分鐘
去既原因純粹因為喺丹頂鶴公園附近
只係去開順路去埋
因為真係冇野睇(仲要俾入埸費,每人460円)
入到去上樓上有個展望台望到釧路濕原咁囉
但咁遠望過去其實係乜都睇唔到的
行個圈準備離開時
我地發現有條小徑
似乎可以近距離同濕原接觸
於是我地有一刻衝動想行去睇吓
可能近睇會完全唔同呢?
之但係我地起步冇幾耐就放棄咗喇
因為係濕原嘛...所以...好多蚊滋
仲唔知有d咩咬我喎
唔好意思喇老公...我頂呢d細隻飛飛飛既野唔順
我要走呀,我唔行呀~~
放棄咗行濕原,唯有跟planning繼續行程
下一站幣舞橋 (map code:149-226-506)
幣舞橋係釧路市既一大地標
而且亦係北海道既三大名橋之一
橋既兩邊分別放置咗春夏秋冬四個雕像
呢日咁好天加上橋下面又係條河
真係影相都影得開心d
聽說幣舞橋既日落還不錯的
以呢日既天氣黎睇,要睇到靚靚日落應該冇難度
可惜時間緊迫,我地夜晚又要去第度住
結果再一次同日落無緣了...... (續)
沒有留言:
張貼留言