2013年10月7日
上回講到我地準備出發去紅葉谷
之前睇過好多blogger都話行去紅葉谷好近
當然人地講緊喺酒店行去好近囉
但一黎我地未check in
二黎我地酒店亦唔近紅葉谷
本黎好應該揸車過去既
但我地見時間尚早
又廢事去到冇位泊車
所以決定行過去....反正行過去都唔駛半個鐘吖
不過話說回來,我地手上係冇明確地圖既
所以一路行都一路擔心會唔會行錯路
而且沿途又冇指示
真係得個估字,仲要一路行都唔見有人架囉
行咗大半路程左右啦,終於有個牌
望住呢個精簡牌地圖....真係無言
不過至少知自己行啱方向囉
一路行....到差不多到紅葉谷入口
大家都突然好開心
因為....前面有紅葉呀!!!
紅紅橙橙好靚喔~~
為免一陣入到紅葉谷冇野睇
當然即時玩咗一輪瘋狂拍照先啦~~
之後行多一條斜路仔
路經咗個super mini停車場 (得10個8個車位)
就見到紅葉谷既入口喇
開頭果5分鐘路程係冇驚喜既
得d綠色既樹,好多好多綠色樹
當個心諗緊...唔係又冇野睇吓嘛既時候.....
嘩嘩嘩....好靚喔
雖然唔係紅紅的
但紅橙黃綠都有一樣好靚啦~~
滿意了滿意了
不停影相,仲拎埋之前喺黑岳手信店既毬藻出黎影相添
跟住再行入去已經冇咩好睇了
似乎頭先嗰個位已經算係最靚喇
一路行只見越黎越綠
而且地下亦越黎越濕
離遠望過去亦唔見有紅紅黃黃既樹
所以冇幾耐我地都掉頭走了
行返出停車場個位
真心覺得呢個位都好靚
可惜泊滿車而且前面亦無路行
如果唔係我好想行入去望真d睇吓有幾靚!!
冇得再行玩到冇野玩
連地下既紅葉都俾我執埋黎玩囉
特別嗚謝老公幫我喺地下搵靚樣既紅葉
等我可以影張所謂既靚相 ^^
離開紅葉谷天還是亮亮的
所以我地決定行返去溫泉街逛逛
反正攞車都要經過溫泉街啦
開頭以為上晝早得滯所以d shop未開啦
Sorry....原來唔係未開,係唔開至真
可能已經過咗旺季,成條街得3幾間shop係有開既
想睇野都冇得睇,係咁易行吓之後都決定去酒店check in了
呢晚我地住層雲峡温泉朝陽リゾートホテル (21,300円, 朝夕食付)
我地間房好似係和洋室
所以床係洋式但其他擺設係日式
都ok啦,最緊要係夠乾淨吖嘛
晚餐酒店包埋既,係食buffet
選擇唔算太多,不過又唔會餓親你咁囉....
想飲野既可以每人加315円
咁就有汽水任飲喇~~
食飽休息個零鐘
出發去浸溫泉
係咁既....check in時我喺counter睇佢地d介紹
發現原來有貸切風呂 (貸切,即係要俾錢既)
見又唔算貴,2,500円50分鐘 (定45分鐘?我唔記得喇)
而且係自己一個房仔唔駛對住d唔識既人
咁咪即刻Book埋浸溫泉囉
浸完溫泉舒服晒
好好瞓返一覺聽日再出去玩~
同朋友講開,既然大家都想去希臘
不如組團一齊去喎
有朋友一齊去又真係會開心d既
雖然去希臘冇野好買
但住宿同其他洗費一d都唔平
於是大家大大聲話一齊慳錢
努力儲旅費去大玩特玩~~
唔....其實我地係講緊2015年9月既事囉
做乜要咁快開始儲錢先?!?
你地有所不知喇
我係洗錢怪黎架~~
勁勁勁鍾意買野.....買衫買鞋.....
買煲買碟.....
有用既冇用既,總之乜都買一餐....
我呢d病黎架....自我控制能力係零
可能係要彌補返細個想買冇得買既心態呱....
總之而家要日日同自己講
唔好再亂買野啦!!
雖然成功機會都好微架喇
但盡量努力啦吓
除咗唔好買咁多野之外
仲要唔好成日出街食飯囉~~
我近期都好少出去食飯既
但買餸煮飯都可以好貴吖
咁要慳錢喇喎
煮中餐一般會比西餐平既....
除非日日食海鮮架啫
所以呢,早兩日整雞翼
去凍肉舖買一磅雞翼只係$19
兩個人食加多個菜就夠喇
咁食又真係幾抵既~~
但唔知有幾多餐可以咁成功囉~
講返個雞翼....我之前都講過雞翼可以有好多整法架啦
今次整韓式雞翼
話時話吖,我好少食韓國野
真係唔知有冇韓式雞翼架喎
不過既然係用韓式辣醬整既
唔叫韓式雞翼唔通叫辣辣雞翼咩!
材料:
雞翼 1磅
韓式辣椒醬 1.5湯匙
生抽 1茶匙
麻油 少許
胡椒粉 少許
紹酒 1茶匙
蜜糖 2湯匙
廚具:
焗爐
做法:
1. 雞翼洗淨吸乾水份放進大碗中,加入所有調味料(除蜜糖)攪勻
2. 用叉子或其他尖既物體於雞翼兩邊刺上小孔,令雞翼更入味
3. 於碗面蓋上保鮮紙,放入雪櫃醃最少4小時
4. 預熱焗爐180度,於焗盤上鋪上錫紙
5. 雞翼放於焗盤上,入爐焗10分鐘 (醃雞翼既汁留起)
6. 取出雞翼反轉再入爐焗10分鐘
7. 剩起之醃雞翼汁與蜜糖撈勻
8. 取出雞翼,將焗爐溫度調至220度
9. 於雞翼兩邊塗上蜜糖辣汁,再每邊焗2-3分鐘即成
上星期我ex-boss黎咗香港
咁約食飯啦,我都好多個月冇見佢喇~
as expected,一約食飯就會問我
你會唔會焗野俾我食?
係呀,佢知我有去學整麵包蛋糕
所以黎香港會見到我時
就想我整野俾佢食囉~~
咁我有時間整都冇所謂既
本來係想整麵包佢食既
但諗諗吓之前兩次都係整包
而且屋企又冇乜特別材料
一時間我唔知整咩包佢食囉
仲有喎,我好耐冇喺屋企整過包喇
我唔知包yeast會唔會已經俾我雪死晒囉
咁不如唔好整包啦
唔整包都唔知整乜好架喎
突然間我記起幾個月前訂咗個貓貓烙印
買咗咁耐一次都冇玩過
咁不如就整豆沙餅啦~~
其實我唔知係叫豆沙餅定豆沙包架
總之就係Doraemon好鍾意食嗰d啦
我唔知我ex-boss鍾唔鍾意食呢d野
但我冇諗咁多喇
因為我知老公好鍾意食囉
整俾老公食順便留少少俾ex-boss食啦~~
我突然覺得自己好偉大囉
整豆沙餅....最終搞咗我幾粒鐘囉
個餅面咁細加上我隻平底鑊又唔係大
一塊一塊咁煎真係煎好耐
之後仲要印個貓貓印喎
好彩我最後決定用現成紅豆蓉咋
自己整又唔知要搞幾耐喇
講咗咁耐我都未講
我唔食紅豆.....所以當然唔食豆沙餅啦
即係我搞一大餐就係整d自己唔食既野請人食囉
所以係咪偉大先?!?
材料 (約15個):
梳打粉 3g
發粉 3g
糖 56g
蛋 2隻
麵粉 200g
牛奶 200g
溶牛油 30g
紅豆蓉 2小罐
廚具:
平底鑊
做法:
1. 梳打粉,發粉及糖攪勻,麵粉過篩備用
2. 加蛋撈開
3. 加入麵粉及100g牛奶攪至無粒粒
4. 加100g奶撈勻
5. 最後再加30g溶牛油 (用熱水將牛油座溶)
6. 開細火白鑊(平底鑊)加入餅漿,煎至起泡泡反轉再煎多一陣盛起放涼7. 開火燒熱烙印然後印於餅面上 (每印一次後都再將烙印加熱)
8. 取一塊餅抹上適量紅豆蓉,再於紅豆蓉上蓋上一塊煎餅即成
其實唁難整,係花時間囉
但整完出黎我真心覺得好靚
靚晒喺個貓貓印度囉~~
不過都唔係得個樣呱
我估應該好食既 (雖然我冇食)
歡迎轉載,但請註明出處~~
2013年10月7日
第二日一早就要起身囉
因為我地要去層雲峽好遠喔
由於我地住平酒店冇早餐
所以之前一既去便利店時已順手買定包包做早餐
本黎想買杯麵架
但我喉嚨痛都係唔好食有湯既野啦
好彩今次呢個咖啡包包好好食
比起尋晚嗰件蛋糕
真係唔同level架
食飽check out埋就先出發拎車先
我地直接同Toyota租咗架Vitz
細車一架,兩個人都夠喇
租5日連保險38,325円
由我地住既酒店行去攞車非常方便
5分鐘左右就去到Toyota喇
去到當然又要搞一輪
等佢影吓passport呀,駕照呀
又聽佢講解一輪保險包乜野呀
有意外時要點做果d野啦~
之後就可以去check車喇
個staff會同你一齊睇一次架車
會mark返低有d咩位本身已經花咗既
廢事還車時有咩事口同鼻拗啦
不過其實佢地都有講
如果有少少花唔嚴重既佢地唔會理架
之後又會幫你set埋GPS咁囉
我地GPS都係用返日文咋
英文睇地方名好似怪怪的
我怕我聽唔明又睇唔明囉
keep返用日文好好多呀!
check晒所有野可以出發喇
咦....做乜要影個鏡?
因為呢個係長身d既鏡
用咗佢唔多駛望左鏡囉
我地專登喺香港帶去北海道架
明明提咗自己好多次
記得要拎返走...但最後...
還車時都係唔記得拎走囉 >.<
拎車後既第一站係層雲峽
我地要乘ropeway上黑岳五合目
車程大約1.5小時
(全程當然靠晒個GPS
但之前要做定功課,搵定要去既地方d map code
到時直接入map code落GPS就ok啦)
附近停車場map code 01658-5-3031
呢日天氣好好
真係坐喺車入面心情都一樣靚靚呀
話咁快就去到層雲峽
泊好車穿過溫泉街好快就見到ropeway站
搭ropeway當然要買飛啦
每位1,850円喔
買好飛等一陣就有車喇~~
出發! Go go go!
之前當然係充滿期望咁上車啦
好想好想見到好多紅葉
唔一定要好似京都咁好紅好紅
有d紅有d橙有d黃都會好靚吖
但....似乎我地遲了
你地睇吓張相就知喇
我知....層雲峽係9月滿開架嘛
我地去時已經10月,係遲了~~
上到5合目都好似冇咩好睇
於是襯未係好多人既時候食咗lunch先
我要咗個おすすめ黑岳set (950円)
個set有豚肉飯同有碗喬麥麵
飯ok好味,但個麵就好唔得囉
老公就要咗個みそ拉麵set (800円)
有餃子食,碗麵都係正常味道既
呀,呢間餐廳叫レストハウス
係五合目入面唯一既餐廳
全自助形式,即係自己去售票機買飛
再將飛交去取食物處
之後等嗌號碼
食飽唔該將餐具拎返去返却口
食飽飽見時間尚早
我地決定再搭多程車去7合目
上7合目既係吊車
兩個人一架車對腳吊吊fling嗰d呀
來回車費每人600円
呢....坐呢d車有人好冇安全感架
成日覺得好似會跌咁喎
但一路驚又一路同我玩自拍囉
其實唔駛驚喎,我覺得好開揚好舒服吖
我估大約坐10-15分鐘左右就上到去7合目喇
上到去.....咪又係冇野睇囉
不過其實沿途都有好多樹
再加埋個靚靚既藍天
就算冇紅葉睇都一樣好正既~~
回程時仲俾我地見到隻好靚既蝴蝶
不過我相信佢應該命不久矣
因為佢就咁企咗喺地下
我地行近佢影相佢都冇反應呀~~
呢日我老公話係生態團
因為除咗見到蝴蝶之外
喺5合目回程時我地仲見到.....
毛毛蟲~~好得意好大條毛毛蟲
好多腳仔又企定定俾我影佢相
一影完佢就走咗了
睇完毛毛蟲我地都走喇
要準備去我地plan好既下一個景點
就係紅葉谷!!
有冇野睇?嘻~下回分解!!
呢幾日一早一晚真係涼咗好多
天氣凍咗,好自然夜晚都會食多咗野
食到飽飽個肚暖暖的好舒服嘛
我咪就係咁食,食到而家咁肥囉.....
我知要食少d野同做多d運動架
不過我太鍾意食野喇
好多時都真係忍唔到口囉~~
好似今晚咁
明明食飯之前已經飲咗碗湯
咁個肚都飽飽地啦
但都食飯既時候
我又成碗飯食晒呀 >.<
唔係話我自己讚自己
飽都可以係咁食既
就梗係d餸煮得好味道啦哈哈
今晚蒸咗個蝦醬豬頸肉
有蝦醬落咗好香好惹味
真係食到停唔到口呀
其實呢個餸我都係第一次整咋
之前試過炒既
不過我又突然醒起細個嗰時呢
一到冬天嫲嫲就會整蝦醬蒸豬肉
我呢....成日覺得蒸豬肉好肥
肥糕我唔食架嘛
咁到我自己整就唔用肥豬肉改用豬頸肉啦
食落口用爽口d添
呢個餸又係快餐
無乜野要搞,醃完蒸熟就食得
仲要好好味送飯一流
唔想煮太多野又唔想出街食飯時
整佢黎食就啱晒喇~
材料:
急凍豬頸肉 2件
蝦醬 1湯匙
生抽 1茶匙
紹酒 1茶匙
麻油 少許
胡椒粉 少許
水 3湯匙
蔥花 適量
廚具:
Le Creuset 22cm Buffet Casserole
做法:
1. 豬頸肉解凍洗乾淨,吸乾水份切片
2. 豬頸肉 用蝦醬,生抽,紹酒,麻油及胡椒粉醃30分鐘
3. 醃好之豬頸肉平均放於22cm buffet上,加入3湯匙水
4. 加蓋開火,中火蒸3分鐘,轉細火蒸4分鐘
5. 熄火再焗5分鐘
6. 食前灑上蔥花即成
小貼士:
1. 如果隔水蒸,可唔落水,大火蒸10-12分鐘即成
天氣開始涼涼地喇
最好就梗係食煲仔飯啦
其實未真係開始涼但過咗中秋之後
我已經整過好幾次煲仔飯
本身我唔係特別鍾意食煲仔飯
仲好唔鍾意d飯焦添
係....食落口係好香口既
但係好痴牙嘛
成餅咁痴住喺個牙面度好麻煩囉
唔鍾意又整?!?
係呀,因為自己煮既話可以煮到冇飯伙焦嘛
人地煮10分鐘我咪煮8分鐘囉
如果出街食飯既話我就唔嗌黎食啦
一黎唔食飯焦
二黎自己都整到
自己煮抵d吖嘛 (c9仔上身)
當然我願意成日整黎食梗有原因既
一句講晒:容易整囉
一個煲開一個爐有飯又有餸
唔駛又煲又鑊,炒完又要煮
最緊要既係老公鍾意食吖嘛
慳時間又有人欣賞
整多幾次都無所謂啦~
今次先講咗最簡單既臘腸煲仔飯先
遲d先再慢慢講其仔款
好似加排骨呀,雞呀, 肉餅咁
嘻,不過可能要等天氣再凍d先~~
材料:
臘腸 4條
米 1杯 (飯煲跟埋果隻杯)
水 適量
煲仔飯豉油 適量
廚具:
Le Creuset 18cm Risotto
做法:
1. 米洗乾淨加入適量水 (比平時煮飯落多少少水) 放入煲中
2. 臘腸一開二放入煲中
3. 開中火邊煮邊攪拌
4. 煮至見到魚眼水時 (即起一個個泡泡時),轉極細火加蓋煮8-10分鐘
5. 熜火後焗20分鐘
6. 食時自行添加適量煲仔飯豉油即成
