<中華料理> 蒜香牛柳粒 (附食譜)

我發覺寫blog呢下野都真係好要求一鼓作氣既
通常有心機既時候呢
可以連續幾日都有新post出
但一冇心機懶起上黎喇喎
又真係可以幾日都唔開機
即係幾日冇post出~~

我成日都叫自己努力d架
不過有時真係會力不從心架喎
製成品既相我有好多
多到有時我自己都未必記得整既時候用過d咩調味料
有d仲要清相時先發現原來未出post
但我唔想開機時就真係唔會開......
都話yahoo要出blog既apps架啦
咁我既出post率一定會高好多

其實今日都仲係冇乜心寫野架
但見之前兩日都冇寫喇
都係咁易抽少少時間出黎寫少少野啦
所以唔整複雜野喇
簡簡單單架啦
咁我可以快快手打起吖嘛
(果然好冇心機寫野)

簡單既....就炒牛柳啦
我覺得呢個堅快手本好喇
最緊要買到d靚牛柳囉
但我今次冇專登揀d咩靚牛柳呀
求其喺凍肉舗買咗pack牛柳粒黎整咋

材料:
牛柳粒 1pack
洋蔥 1/3個
蒜蓉 1.5湯匙
炸蒜 少許
生抽 1湯匙
紹酒 1茶匙
黑椒 少許
麻油 少許
糖 半茶匙
粟粉 半茶匙
胡椒鹽 少許

做法:

1. 牛柳粒解凍吸乾血水,用1湯匙蒜蓉,生抽,酒,黑椒,麻油,糖及粟粉醃30分鐘
2. 洋蔥去衣切條備用
3. 1湯匙油起鑊,爆香半湯匙蒜蓉
4. 加入洋蔥炒1分鐘
5. 加入牛柳粒炒至8成熟(由於牛柳粒厚身較難熟,所以炒其間可灑少許水,以免炒燶牛柳,少少好喇,唔好勁加水)
6. 灑上少許胡椒鹽及炸蒜,再快炒數下
7. 上碟多灑一點炸蒜即成

小貼士:
1. 炸蒜千期唔好太早落,如果唔係燶晒痴晒底d牛都未熟

<西餅甜品> 鮮奶蛋白燕窩撻 (附食譜)

上一個post講緊冰糖燉燕窩
有睇到既朋友都知我浸得太多燕窩
燉2盅燕窩竟然用唔晒
咁我冇理由掉咗d燕窩架
雖然唔係貴野但都唔好嘥吖
所以用剩果d
我keep返起搵保鮮紙包住雪入雪櫃囉

都發好晒咯
最好唔好擺咁多日啦
快d食埋佢好d
廢事一陣真係變咗唔要得啦~~

不過我唔想連續兩日都食同一樣樣呀
所以好鬼認真咁同老公研究
唔燉埋黎食既話可以整乜野好~~
開頭老公話整燕窩西米糕
我仲好快咁話好呀
聽日去買西米整囉
(但我當時冇諗到咩係西米糕)

到我第二日再諗既時候
先發展西米糕係泰式甜品
唔....西米糕有椰汁架
我唔多鍾意囉
食一件半件勉強ok既
但加燕窩.....唔好啦.......

點好呢?!?唯有努力再諗啦....
到底有咩甜品加燕窩好呢
其實又唔係剩返好多.....
平時食buffet有咩甜品有加燕窩架????
諗諗吓,用黎整撻都好多
雖然功夫多咗少少
但我一定會食吖嘛~

材料 (6個):
撻皮
低筋粉 150g
牛油 100g
糖 30g
雞蛋 半隻

撻餡
燕窩 隨心(豐儉由人)
蛋白 80g
鮮奶 140g
糖 35g

做法:

1. 燕窩洗淨浸4-5小時,期間換水2次,除去雜毛備用
2. 低筋粉過篩,加入牛油及糖
3. 用手將(2)之材料搓成碎粒(牛油粒),並倒於工作枱上
4. 於牛油粉粒中間開一個洞,於洞中加入雞蛋
5. 將所有材料搓成粉團,用保鮮紙包好放入雪櫃備有
6. 蛋白打散過篩備用
7. 糖加入鮮奶中,慢火將糖煮溶(不必煮滾)
8. 蛋白加入煮好之蛋奶中攪勻,入雪櫃雪15分鐘
9. 將撻皮粉團分成6份
10. 於撻模上灑上少許低筋粉,放入粉團,將粉團均勻地壓在模上 (撻邊要高過撻模)
11. 於蛋皮上刺上小孔,再倒入蛋白漿至8成滿
12. 最後於蛋白漿上加入燕窩
13. 預熱焗爐200度
14. 蛋白撻入爐先焗10分鐘
15. 轉140度再焗10分鍾即成

<西餅甜品> 冰糖燉燕窩 (附食譜)

好似好耐冇出post講整糖水甜品喇
都係時候整返d甜品啦~
本黎再開呢個新blog既時候
係想post多d整麵包蛋糕既野架~~
因為我學緊吖嘛.....

但係印象中我應該冇post過麵包相囉
係咁既....而家天氣咁熱
我真係冇喺屋企整包包囉
上堂時我又冇影step相既
所以冇得post
希望遲d天氣涼既時候
我仲有心機整包啦~~

唔整包就整糖水啦
仲要係整d簡單既
冰糖燉燕窩夠晒簡單喇呱~
簡單好味又養顔
好野係架~~

其實今次係我第一次整燕窩
雖然我不嬲都鍾意食
但我唔識買又唔識整吖嘛
好驚亂咁買會俾人呃囉
所以我淨係講"不如買d燕窩返屋企整"都講咗好耐
但又冇實際行動囉

係....係可以唔駛自己整既
出去食都得
但既然我係唔識既
出去食就更加唔知人地俾d咩我食啦
喺香港食一碗質素好少少既燕窩要幾錢?
唔方平啦....我唔捨得勁貴食一碗唔sure靚唔靚既燕窩喎

咁....咁所以我去親bangkok都會去唐人街食囉
真係抵食吖嘛
最大既問題係我唔會成日都去bangkok架
咁突然想食時咪又冇得食?!?
講到尾都係自己整最好架喇

講咗N個月,最後有日無啦啦走咗去買
我去咗樓上燕窩莊度買
因為乜都唔識
所以都係問sales姐姐買乜好
本來以後咁走去問
佢實sell我最貴嗰d啦
哈,點知又冇喎

個姐姐好鬼老實
佢問我買黎送禮定自己食
送禮呢....買燕盞就好睇d
自己食呢,其實唔駛買燕盞都得
普普通通買d$6xx一両既粗白燕絲都ok喎

好啦...我又唔識
唔好買d貴野返去喇
一陣整衰咗好肉痛架嘛
反正佢話同燕盞分別唔太多
係發完出黎冇咁多
同埋可能多少少雜毛啫

買完又喺屋佐擺咗一輪
早兩日終於試整咗
第一次唔識預份量
發開好大碗 (燉2盅滿滿既都仲有剩)
d燕絲幾靚,浸完揀唔到雜毛出黎咁滯
燉完出黎啖啖燕窩,抵呀
(我問老公覺唔覺好似食緊鼻涕咁,多到呢)

材料:
燕窩 20g (應該可以減咁d)
熱水 500ml
去核紅棗 2粒
冰糖 適量

做法:

1. 燕窩洗淨用水浸4-5小時,期間換水2次
2. 檢查發好既燕窩,除去多餘既雜毛(黑色細細條)
3. 將發好既燕窩及紅棗放入燉盅
4. 煲一煲熱水(不包在材料內)
5. 於燉盅內注入熱水,蓋上燉盅蓋
6. 水滾後於煲底鋪上竹墊,放入燉盎細火燉半小時
7. 於燉盅內加入冰糖再燉5分鐘即成

<日式料理> 香煎日式雞肉丸 (附食譜)

呢個日式雞肉丸我想整咗好耐架喇
不過我一直都的唔起個心去整
因為.....我唔鍾意剁肉囉
我成日都話我隻手冇力架啦
剁肉剁一陣就發晒軟啼咁
都唔知要搞幾耐先搞得掂.......

至衰屋企冇food processor囉
有就一定方便好多
起碼唔駛自己剁先吖
但我冇諗過要買一部俾自己喎
哈....我廚房真係冇晒位架啦
之前買買埋埋咁多LC
黑洞都有迫爆既一日架嘛

我又有諗過唔好理咁多
將d雞肉放入Blender度攪鬼爛佢
唔....但我冇加任何流質野落去架喎
就咁攪d肉可以會gel實晒喺個刀身度
攪唔成之餘仲要洗餐懞既咪仲大鑊
於是咪一路得個諗字囉

一拖再拖....拖咗幾個月
早幾晚終於整咗黎試
原因係....我真係諗唔到有咩好煮.....
一向以黎,我都想盡量整多d唔同既野俾老公食
當然冇可能完全唔重覆啦
但盡可能每樣餸既出場率唔好太密囉
呢個星期真係R爆頭都唔知整乜好
咁唯有死死地剁肉啦~~

呢個餸個汁底好啱送飯
所以我專登整大份汁架
如果唔鍾意撈汁食既
個汁份量可以減至少一半喎~~

材料:
雞柳 250g
豬肉碎 2湯匙
洋蔥 1/3個
雞蛋 半隻
麵包糠 半碗
日式醬油 3湯匙
味醂 3湯匙
料理酒 3湯匙
糖 1.5湯匙

做法:

1. 雞柳洗淨吸乾水份,先將雞柳切粒,再剁成雞肉碎
2. 洋蔥去衣切粒
3. 雞肉碎,豬肉碎及洋蔥攪勻,再加入基本醃料醃20分鐘 (我用雞粉,糖,胡椒粉,酒,麻油及栗粉醃)
4. 加入雞蛋及麵包糠攪勻
5. 手濕少少水,將肉碎分成10份,每份均搓成圓形
6. 將搓好之雞肉丸放入雪檳雪15分鐘
7. 所有調味料拌勻備用
8. 從雪櫃取出雞肉丸,中火燒1湯匙油起鑊
9. 油滾後轉細火,加入雞肉丸煎至9成熟
10. 最後加入調味料煮沸即成

小貼士:
1. 味醂於各大日式超市有售
2. 加入麵包糠可令肉丸質感鬆化,如果全肉煎好之後口感比較硬
3. 可加入馬蹄碎於肉丸中,口感更佳

<日式料理> 金菇牛肉卷 (附食譜)

牛魔王又出動
今次整個金菇牛肉卷
無特別諗住整
只不過係上星期打風
睇吓屋企雪櫃有d乜就整咗黎食啫
廢事好似d人好似走難咁
去街市同supermarket搶野.....

係架,我屋企個雪櫃長期都full架啦
所以都唔駛驚冇野食既
驚我懶得煮好過啦
有時自己一個人食
明明成雪櫃都係野
我都會話屋企冇野食囉
(因為我唔想開爐吖嘛)

咁個雪櫃咁full
肥牛通常會長駐冰格
因為肥牛可以整到好多唔同既野嘛
好似肥牛煲,牛肉飯.....
用黎炒意粉炒泡菜又得
再唔係可以黎個日式牛肉鍋亦得
咁鬼好用點可以唔長期擺d喺屋企吖.......

講返今次個金菇牛肉卷吖
其實我好認真咁諗咗好耐
究竟佢係中菜定日本菜呢?
有冇人可以話到俾我知架?

我第一次食呢樣野係喺杏花樓食既
咁應該算係中菜啦,係咪?
但我而家睇返我自己個做法
個汁用緊日本野整架喎
同埋去日式居酒屋
都有呢個餸嗌架喎
咁.....咁即係日本野?!?

er....我唔知啦.....
我自己覺得金菇都算係日式野
再加埋個日式汁
所以我決定當佢係日本菜啦

材料:
肥牛 1x 塊
金菇 1包
日式醬油 2湯匙
料理酒 3湯匙
味醂 1.5湯匙
糖 1.5湯匙
栗粉 適量

做法:

1. 金菇切去尾段洗淨,吸乾水份備用
2. 肥牛解凍後吸乾血水
3. 拿一片肥牛平放於砧版上,於牛肉上放上適量金菇
4. 用牛肉將金菇慢慢卷上,並於牛肉末端沾上栗粉耐口
5. 將所有調味料攪勻備用
6. 用1湯匙油起鑊,放入牛肉卷慢火煎熟 (先煎耐口位那邊)
7. 盛起牛肉卷,倒入調味料煮滾
8. 將煮好既汁淋於牛肉卷上即成

<日式料理> 鹽焗鯖魚 (附食譜)

其實由頭到尾我都冇諗過post呢味餸出黎
所以只有完成圖一張
中間整既過程完全冇影過相
呢個餸我已經煮過好多次
但真係從來冇影過製造過程

係咁既.....我覺得呢個餸實在太容易整喇
零難度加零驚喜
我會整呢個魚既原因
純粹係一個懶字.......

有煮開飯既人都知
就算你幾鍾意煮野食
就算你平時幾有心機煮野食
都總有時候想偷吓懶架嘛
好正常架係咪先?

咁我話想偷懶啫
又唔一定係要出街食既
煮飯煮得越多
出街食飯既意欲就越黎越低
一黎好多時會覺得自己煮得好味d (又乘機讚自己)
二黎出去食飯真係好貴
兩個人cheap cheap地去茶餐廳食都過百
都係自己煮抵好多喎~~

所以想偷懶又唔想嘥錢既時候
最好既解決方法就係煮簡單野啦
呢個鹽焗鯖魚就係其中一樣想偷懶時整既餸
講得係偷懶時先煮
咁複雜極都有限啦

既然咁簡單我又做乜出post呀?!?
我堂妹囉.....喺面書先到張相
問我拎recipe喎
咁既然係咪都要打一次個recipe出黎
當然喺blog度打好過喺面書度打啦

材料:
鯖魚柳 2條
胡椒鹽 適量
七味粉 適量 (乜都話適量,係架,我自己都係隨意落架咋)
檸檬汁 2茶匙 (半個檸檬夠有突)
蛋黃醬 2湯匙

做法:
1. 鯖魚柳洗淨,用廚房紙吸乾水份
2. 於魚柳既兩面均灑上胡椒鹽及七味粉,醃20分鐘
3. 預熱焗爐200度
4. 將魚柳放於焗盤上(魚皮向上),入爐焗7分鐘
5. 將魚柳反轉,多加少許胡椒鹽及七味粉
6. 再入爐多焗7分鐘即成
7. 先灑上檸檬汁,食時再伴以蛋黃醬食更美味

小貼士:
1. 鯖魚柳一般凍肉舖及大型超市有售
2. 如果唔想焗,加酒細火落鑊煎一樣得

<洋式料理> 黑松露鵝肝醬蒸蛋 (附食譜)

普通蒸蛋大家都食得多架啦
好似瑤柱蒸蛋,肉碎蒸蛋
又或者就咁用雞湯蒸水蛋
真係我自己都食唔少
所以今次不如攪攪新意思
整返個黑松露鵝肝醬蒸蛋啦

其實我邊有咁好諗頭吖
我抄人架咋,哈哈
上兩個星期上朋友屋企吖嘛
攞晒佢屋企d cook book黎睇喎
睇到朋友本May姐有教鵝肝醬蒸蛋
我鍾意食鵝肝架嘛
當時已經諗住試吓整啦

咁尋日有朋友上黎我屋企食飯
於是咪諗住試吓整呢個蛋囉
後尾諗諗吓又覺得黑松露同鵝肝醬都應該幾夾喎
所以咪出咗我呢個變種版既黑松露鵝肝醬蒸蛋

如果有May姐本食譜既朋友應該識整架喇
同我呢個大同少異啦
不過我個變種版既份量呢
冇跟May姐既,係自己改咗架
同埋材料又唔係一樣囉
但蒸完出黎一樣好好味
呢個富貴蛋,我鍾意呀~~

材料 (二人份):
黑松露鵝肝醬 45g
雞蛋 2隻
雞湯 250ml
黑松露醬 適量
番茜 適量

做法:

1. 黑松露鵝肝醬及雞湯放入攪拌機內攪勻
2. 加入雞蛋中速將材料攪勻
3. 將蛋漿過篩倒入焗杯/碗中
4. 於杯/碗面鋪上保鮮紙,中大火隔水蒸13分鐘
5. 熄火再焗3-5分鐘
6. 除去保鮮紙,於蛋面上加上黑松露醬及番茜即成

<中華料理> 瑤柱蛋白蒸豆腐 (附食譜)

成日都好似食好多野咁
個人日日都好飽
真係想唔肥死都唔得啦
都係時候食返清淡少少喇
嘻....我既清淡唔會維持到好耐架
因為我實在太鍾意食野囉
睇黎都係時候開始跳返鄭多燕喇.....

清淡.....有幾清淡
豆腐夠清淡啦
講開豆腐.....黃豆整既.....
都屬於係寒涼野啦
女士食得太多唔好喎.....

但係呢.....我好鍾意食....
所以涼我都一樣會食好多囉
難怪N年前睇中醫時
佢話我係激寒底啦
當時佢仲俾我張紙list out晒有d咩係屬於寒既
叫我唔好食喎

我好記得我嗰時拎住張紙
不停同老公講
車,咪即係乜都唔好食?!?
哈,原來我平時鍾意食既野
好多都係寒涼野喎
完全解釋晒我既激寒底係點黎架啦
不過到目前為止
我都冇戒過口囉.......

你地睇我又整豆腐就知啦
其實我唔知有冇呢個瑤柱蛋白蒸豆腐既餸架
我見人地出面有蛋白花彫蒸蟹
咁我想食蒸蛋白,又唔想整蟹
所以咪蛋白蒸豆腐囉
但得蛋白同豆腐成碟白雪雪唔靚
我咪又加d瑤柱落去囉~~

材料:
蒸煮豆腐 1盒(約150g)
瑤柱 3-4粒
蛋白 4隻
清雞湯 120ml
鹽 半茶匙
蔥花 少許

做法:

1. 瑤柱洗淨浸軟,隔水蒸30分鐘,撕成絲備用
2. 蛋白打散,加入清雞湯及鹽打勻
3. 豆腐切成4片,平放於碟上
4. 於豆腐面上倒入蛋白湯,並灑上瑤柱絲(先留起少許瑤柱絲)
5. 於碟面鋪上錫紙,中火隔水蒸8-10分鐘,熜火焗5分鐘
6. 最後於蛋白中間放上之前留起既瑤柱絲,再灑上蔥花即成

<洋式料理> 水牛芝士番茄沙律 (附食譜)

天氣熱時整沙律食真係好好
好係我自己輕鬆咋
至於老公鍾唔鍾意食又係另一回事囉
同埋其實沙律.....
係一d冇難度既野黎架嘛
所以其實都唔駛我講點整啦

我認真架
今次我唔會有詳細既steps相喇
因為都冇steps啦
全部都係切切切
之後放落隻碟度
加少少sauce就食得喇

唯一要講一講既
係我d材料
我用晒d mini size既野黎整個沙律呀
番茄...我用咗日本番茄仔
應該會比平時d番茄細1/3左右啦

至於水牛芝士....
我又係買咗mini版
平時一包睇唔到樣果d好鬼大粒架
我今次買呢隻好細細粒既
你地可以睇吓張相
專登影俾你地睇既
用黎整沙律切咗頭同尾既話
一粒只可以切到兩片架咋

所以你地整既時候要留意返份量啦
如果買正常size既野
就唔好跟足我個recipe喇
自己減份量喔

材料:
日本番茄仔 4個
軟水牛芝士 6粒
羅勒葉 數片
橄欖油 1湯匙
黑醋 1湯匙
番茜 適量
黑椒 少許

做法:

1. 番茄洗淨切皮,軟水牛芝士切片
2. 羅勒洗淨剁碎
3. 橄欖油及黑醋攪勻
4. 將番茄及軟水牛芝士以梅花間竹方法於碟上排好
5. 灑上羅勒碎,黑椒及加上番茜裝飾即成
6. 食時伴以橄欖油及黑醋食便可

<中華料理> 柱侯蘿蔔牛腩煲 (附食譜)

心思思又試整牛腩煲
明明天氣好熱
仲走去整d咁既野.....
冇計,因為我想食~~
同埋整過好多次都唔多成功

唔成功又未至於唔食得
不過唔夠味咁囉
明明d牛腩已經炆到林晒
但點解都係唔多入味架呢?!?
冇理由架嘛.......
所以我要試到成功為止!!!
(今次應該算成功喇,老公讚好味!!)

尋日去街市買牛腩
先見原來牛肉平咗喎
之前買$80牛腩得好少架喎
但尋日同樣價錢,舊牛腩大好多
問下牛肉佬,佢話係呀平咗呀
早知唔買咁多啦.....

人地平時炆牛腩會成舊炆完先切
我呢....人懶吖嘛
又怕一炆起熱辣辣切唔落手
所以我一定切定晒先囉
冇所謂啦,自己食之嘛

材料:
牛腩 500g
白蘿蔔 大半條
八角 2粒
牛肉湯粒 半粒
水 500ml
冰糖 1小粒
柱侯醬 3.5湯匙

做法:

1. 牛腩洗淨汆水
2. 蘿蔔去皮,洗淨切件
3. 爆香柱侯醬,加入牛腩炒香
4. 加入水中火煮滾,滾起後加入八角,牛肉湯粒及冰糖
5. 加蓋轉細火煲30分鐘,熄火焗30分鐘
6. 再開中火滾起後轉細火煲30分鐘,熄火焗30分鐘
7. 開中火加入蘿蔔,滾起轉細火煲15分鐘
8. 熄火焗至臨食前,開火煮滾即成 (最後呢轉我焗咗3個鐘)

小貼士:
1. 如果唔係用LC煲煮,要多加一點水份,否則好易煲乾水
2. 加入冰糖可使牛腩更易炆林

<洋式料理> 焗鮮茄豬扒飯 (附食譜)

嘩.....執執自己d煮飯相時
俾我執到d好野出黎
焗鮮茄豬扒飯!!!
呢個好野黎架

一整起既時候已經諗住要出post架喇
但佢一路都排喺隊尾之嘛
我諗佢排咗成個月隊喇
排排吓排到我都唔記得咗佢
今次執一執相令佢可以重見天日啦~

唔好以為焗豬扒飯之嘛
其實一d都唔簡單
唔簡單既意思係冇我想像中咁快整好囉
話難又唔係難既
但中間有好多步驟囉
懶人如我竟然肯花時間同心機
去整一個咁多個steps既焗飯
想必一定係好野黎架啦~哈哈~

我認真架
味道ok唔錯
老公都有讚話好味道
所以如果唔怕麻煩既話
都可以試吓整囉

材料 (2人份):
白飯 2碗
雞蛋 2隻
無骨豬扒 5塊 (好細塊架咋,如果大size兩塊就夠喇)
洋蔥 半個
罐頭番茄 1/3罐
新鮮番茄 2個
茄膏 1湯匙
茄汁 1.5湯匙
鹽麴 2茶匙
蒜蓉 2湯匙
老抽 1茶匙
麻油 少許
糖 2茶匙
水 3湯匙
黑椒 少許
Mozzarella芝士碎 3湯匙
Parmesan芝士粉 少許

做法:

1. 豬扒洗淨吸乾水份,用刀背剁鬆豬扒,再用鹽麴,老抽,麻油及1湯匙蒜蓉醃20分鐘
2. 雞蛋打散,番茄洗淨切件(1開8),洋蔥去衣切大片備用
3. 用油起鑊,倒入一半蛋漿
4. 蛋半熟時,加入白飯炒勻
5. 加入少許鹽並將飯炒至乾身
6. 倒入剩下之蛋漿炒勻,熄火
7. 將炒飯倒入焗盤上備用
8. 再用油起鑊,放入豬扒中慢火煎至兩面金黃(當然要熟架啦)
9. 豬扒放於炒飯面上
10. 用返煎豬扒隻鑊,加少少油,爆香1湯匙蒜蓉
11. 加入番茄及洋蔥炒香
12. 再倒入罐頭番茄,茄膏,茄汁及水煮至杰身
13. 加入糖,試味,太酸可多加糖,唔夠酸可加返少少鹽
14. 將煮好既茄汁鋪上飯面
15. 預熱焗爐200度
16. 於飯面灑上黑胡椒,芝士碎及芝士粉
17. 放入焗爐焗10-15分鐘即成

<日式料理> 味噌豆腐湯 (附食譜)

其實我真係好鍾意食日本野
不過識整俾自己食既野又唔多囉
同埋我不嬲都係太難太煩既野唔好預我架嘛
我手腳慢,整簡單野都要搞好耐
如果仲要我整複雜野
睇怕餓鬼死都未有得食......

同埋呢....我eq低呀
如果喺廚房入面焗住整野食
又仲要整好耐都未有得食既話
我就會開始發脾四架喇
所以呢...又簡單又好食既就最理想啦~~

要整簡單日本野
最好就係整d乜丼物丼啦
我係牛魔王,所以最鍾意食牛丼
但得個飯又好似有少少悶
所以我今次加多個味噌豆腐湯

哈,我老公飲個湯既時候
佢竟然問我,個湯係一包包架
佢講緊出面一包粉沖熱水飲得嗰d
我話緊係唔係啦,自己煲架
點知佢仲繼續問:點整呀?

車....唔通我用沖水既會呃你話自己整咩?!?
自己入廚房睇吓啦
仲有大大煲味噌湯喺度呀
照計我唔會一次過沖幾包湯粉落個煲度呱?!?
話完佢佢先講話味道同出面既好似
所以以為我買現成喎....
都唔知好嬲定好笑!!

牛丼我唔再教你地整喇
因為之前已經出過post架喇
有興趣既可以去呢條link度睇返:
http://kitchenofsnow.blogspot.hk/2013/05/blog-post_22.html
至於飯面上面隻蛋
呢度有講過:http://kitchenofsnow.blogspot.hk/2013/07/blog-post_28.html

材料:
蒸煮豆腐 1盒 (我買細盒)
魚乾 5條
脫水海藻 1湯匙
水 900ml
鰹魚粉 半茶匙
味噌 3-4湯匙

做法:

1. 魚乾洗淨,豆腐切粒備用
2. 煲一煲水,水滾時轉細火放入魚乾,加蓋煲25分鐘
3. 將魚乾撈起
4. 轉中火加入鰹魚粉及味噌,煮至味噌完全溶化
5. 加入脫水海藻煮1分鐘
6. 最後加入豆腐粒煮滾即成

小貼士:
1. 魚乾可於街市雜貨舖購買,我都唔清楚我買既係咩魚乾,我同姐姐講話想煲湯用黎吊味,佢就俾咗呢隻魚乾我
2. 味噌於各大日式超市有售
3. 脫水海藻亦於各大超市有售,有時12蚊店都會有

<日式料理> 芒果蟹籽沙律 (附食譜)

唉....呢排d天氣....
一係日日都落雨
一係就曬死雞
不過好天又好落雨又好
總括黎講都係熱

咁鬼熱,如果可以既話唔好開爐整野啦
(哈,又想俾藉口自己偷懶)
我既意思唔係出街食
亦都唔係嗌外賣呀
只不過係提議整d唔駛開爐都整到既野咋~~

最簡單既就梗係整沙律啦
但我知鬼佬沙律唔多啱老公食囉
即係番茄呀,火箭菜呀,橄欖呀
如果我整呢d出黎
就等同叫老公唔好食野一樣

咁我當然唔會咁玩佢啦
(除非佢激嬲我啦,咁就好難講)
左諗右諗....如果一定要整沙律既話
最安全既應該係整蟹籽沙律
又或者係凱撒沙律

咁其實是旦整邊樣都ok
但印象中老公好似愛食蟹籽沙律多d喎
一於就蟹籽沙律啦
不過我鍾意加埋芒果落去
(純粹係因為可以整得靚d,哈哈)
呢個零難度必成功既沙律
人人都可以做到喔

材料:
青瓜 1條
芒果 1/3個
即食蟹柳 5-6條
蟹籽 適量
蛋黃醬 適量

做法:

1. 青瓜洗淨刨成絲,放入沙律碗中
2. 蟹柳一開二,放於青瓜絲上
3. 芒果去皮切薄片,於青瓜絲中間位置砌成一朵花形
4. 隨意唧上適量蛋白醬
5. 最後曬上蟹籽即成

小貼士:
1. 如果想凍食,可先將青瓜絲雪凍後才加上其他配料

<中華料理> 脆炸蝦多士 (附食譜)

 

蝦多士呀,今次出post出得好快
呢個係新鮮滾熱辣
啱啱尋晚整黎食架
今朝即刻post食譜出黎
理由又係只得一個
有人問我拎食譜

無啦啦做乜咁心血來潮整蝦多士?
係囉,呢d咁多工序既野
我平時機乎唔會整架
何解今次會玩自己搞餐矇
為既係幾塊蝦多士?!?

話說我有日睇May姐有請(可能我記錯)
見May姐教整蝦多士
我平時唔鍾意食魚啫
但蝦我都ok架嘛
又睇到May姐整完出黎好似好好味咁
(我知我同佢唔同level,實冇整得咁好)
咁咪又想試吓自己整囉

其實我真係唔肯定係咪睇May姐有請見到既
因為我有上返去tvb.com搵
想睇返多一次究竟係點整
但我飛跳咗好幾集都搵唔到
印象中我唔係好耐之前睇過架咋
不過我又真係搵唔返

冇得睇返即係唔知點整啦
唔緊要....我仲記得少少既
之後再加少少平時自己煮野既技巧
應該都整到出黎呱
嘻....所以我冇理,照去街市買蝦整

材料 (8件):
海蝦 半斤
半肥瘦豬肉 50g
無邊方包 2片
雞蛋 2隻
鹽 半茶匙
雞粉 1茶匙
糖 半茶匙
發粉 1/4茶匙
梳打粉 1/4茶匙
麻油 少許
胡椒粉 少許
蛋白 半隻

做法:

1. 海蝦先放雪櫃雪3-4小時
2. 海蝦去殼,於蝦背用刀界一刀,取出蝦腸
3. 洗淨蝦肉並吸乾水份 (一定要吸乾)
4. 用刀先將蝦身拍扁,再切成細粒,最後剁成蝦碎
5. 將剁好既蝦肉放入大碗內,再用手拎起蝦肉撻落碗中,重覆多次至蝦肉起膠
6. 於蝦膠中加入蛋白,少許鹽及粟粉拌勻,再放入雪櫃雪15分鐘
7. 豬肉洗淨抹乾,剁成肉碎
8. 豬肉同蝦膠攪勻(攪拌時要同一方向攪)
9. 再加入所有調味料(除麻油)混勻
10. 攪勻後才加入麻油再攪勻
11. 方包每片分切成4小塊,再釀入蝦膠
12. 雞蛋打散備用
13. 燒一煲油(唔駛太滾,放入筷子見有少量汽泡便成)
14. 方包沾上蛋漿,放入煲中炸約1分鐘(先炸蝦肉那邊)
15. 反轉方包再炸1分鐘
16. 取出放於廚房紙上吸去多餘油份即成

<中華料理> 南乳吊燒雞 (附食譜)

為咗証明我真係有煮吓中菜
(其實我之前post出黎既recipe有好多都係中菜啦)
今日又係時候俾d中式野你地睇
隻雞.....好似幾個星期之前整架喇
不過一路排緊隊等亮相之嘛

成隻雞買返黎整
對我黎講真係人生大挑戰
咁耐以黎我未試過買成隻雞返屋企整架
(春雞咁細隻唔算啦)
未整一諗起要用我嗰隻冇力既雞支手斬雞
即刻頭都大埋啦

咁鬼驚做乜又玩挑戰先我呢?
因為我上個月換咗個大既32L焗爐囉
有咁大個爐唔焗雞真係嘥晒
加上我見我堂妹焗完隻雞好靚
自己又心思思想試吓囉~

決定咗整喇
買雞又有疑問
到底我要唔要買新鮮雞呢?
er...其實隻雞我係咪都要入雪櫃醃過夜架啦
咁係咪新鮮都應該冇關係啦
就係咁,我走咗去冰鮮雞

第一次整雞第一次斬雞
係就係斬得唔靚架喇
我仲要唔夠力斬
所以砌唔返隻雞樣出黎都好正常吖
總之隻雞食落口好味就得啦~

材料:
雞 1隻(約2斤)
南乳 1大件
蒜蓉 2湯匙
生抽 150ml
紹酒 10ml
鹽 1茶匙
麻油 1茶匙
白醋 1湯匙
玫瑰露酒 1茶匙
蜜糖 1茶匙
滾水 1大煲
冰水 1大支

做法:

1. 雞洗淨抹乾,斬去雞頭雞腳
2. 雞用南乳,蒜蓉,生抽,紹酒,鹽及麻油醃過夜(要入雪櫃喔)
3. 醃好既雞用清水洗乾淨
4. 煲一煲滾水,然後均勻地淋於雞皮上
5. 再將冰水均勻地淋於雞皮上
6. 將雞吊起風乾30分鐘
7. 用熱水座溶蜜糖,再加入白醋及玫瑰露酒攪勻,並塗抹於雞皮上
8. 繼續將雞吊起風乾3-4小時
9. 預熱焗爐200度
10. 用焗爐附送之烤雞架將雞固定於爐內,焗50分鐘後取出斬件即成

小貼士:
1. 用焗盤焗都得,不過要中間反一反轉隻雞再焗,如果唔係雞皮顏色會唔靚架
2. 如果怕隻雞唔夠味,可以先留起部份醃肉既汁料,加入水同糖煮滾用黎點雞食都得